Ulttyq bank 2025 jyldyń alǵashqy jarty jylyndaǵy tólem júıesine qatysty esep jarııalady. Esepte otandastarymyzdyń qalaı jáne qaıda aqsha aýdaratyny, bank qyzmetterin qanshalyqty paıdalanatyny týraly málimet berilgen, dep jazady Egemen.kz.
1 myń adamǵa 97 POS-termınal
Bıyl elde 910 myńnan astam kásipkerge tıesili 1,146 mln saýda ornynda 1,357 mln POS-termınal jumys istep tur. Bul ótken jylmen salystyrǵanda 17%-ǵa kóp. Qazir 1 myń adamǵa 97 termınaldan keledi. Byltyr bul kórsetkish 84 bolǵan. Eń kóp termınal Almatyda, Astanada jáne Qaraǵandy oblysynda ornalasqan. Úsh óńir eldegi barlyq termınaldyń 40%-yn qamtıdy.
Ár otandasymyzdyń tórt bank kartasy bar
Onlaın-bankıng qoldanýshylar sany 12%-ǵa ósip, 27,1 mln adamǵa jetti. Elde barlyǵy 81,7 mln tólem kartasy bar. Sonyń 41,3 mıllıony – belsendi, ıaǵnı aıyna kem degende bir ret paıdalanylady. Demek árbir otandasymyzdyń orta eseppen tórt kartasy bar, onyń ekeýi únemi qoldanysta.
Qolma-qol aqsha sheshý azaıyp jatyr
2025 jyldyń birinshi jarty jyldyǵynda halyq 6,8 mlrd tólem men aýdarym jasady. Barlyǵynyń somasy – 100,7 trln teńge. Bul ótken jylmen salystyrǵanda sany boıynsha 12%, al kólemi boıynsha 19%-ǵa kóp. Barlyq operasııanyń 98%-y qolma-qol emes. Al aqsha sheshý sany 4%-ǵa azaıǵan, biraq kólemi 9%-ǵa artqan. Ortasha chek 112 myń teńge bolǵan (byltyr 98 myń teńge edi).
Halyqaralyq aqsha aýdarymdary azaıdy
2025 jyldyń alǵashqy jartysynda halyqaralyq júıeler arqyly 854,8 myń aqsha aýdarymy jasaldy. Barlyǵynyń somasy – 337,8 mlrd teńge. Bul byltyrǵydan 14,5%-ǵa az. Shetelge ketken aqsha kólemi 321,2 mlrd teńge boldy, ıaǵnı 16%-ǵa tómendedi.
Aýdarymdardyń 80%-y «Zolotaıa Korona» men «Western Union» arqyly júrgizildi. Al shetelden kelgen qarajattyń 99,9%-y tegin (qaıtarymsyz) aýdarymdar bolǵan.
Azamattarymyz aqshany kóbine qaı elderge jiberedi
Elimizden eń kóp aqsha Reseıge (31,7%), О́zbekstanǵa (29,7%), Túrkııaǵa (18,2%), Grýzııaǵa (6%) jáne Qyrǵyzstanǵa (3,3%) aýdarylady. Bir sheteldik aýdarymnyń ortasha somasy – 398,9 myń teńge.
Qazaqstanǵa kelgen aqsha kólemi 12,5%-ǵa azaıǵan. Elge 304,9 myń aýdarym jasalyp, jalpy somasy 105,4 mlrd teńge bolǵan. Aqsha eń kóp Reseıden (24%), AQSh-tan (14,9%), О́zbekstannan (10,3%), Túrkııadan (9,5%) jáne Germanııadan (7,7%) kelgen. Bir aýdarymnyń ortasha somasy – 345,6 myń teńge.