Ekonomıkalyq yntymaqtastyq jáne damý uıymy júrgizgen «TALIS-2024» sabaq berý jáne oqytýdyń halyqaralyq zertteýiniń nátıjesi boıynsha, elimizdiń bilim berý júıesinde oń ózgerister baıqaldy. Bul Prezıdent Qasym-Jomart Toqaev bastamashy bolǵan bilim berý salasyn damytý jáne pedagog mártebesin arttyrý sharalarynyń tıimdi júzege asyrylyp jatqanyn kórsetedi.
«TALIS» zertteýi bilim berý ortasyn, pedagogterdiń eńbek jaǵdaılaryn, kásibı damý múmkindikterin, oqytý tájirıbesin jáne kásibı ustanymdaryn baǵalaıdy. Zertteýge elimizden 7 myńnan astam pedagog jáne 369 mektep dırektory qatysty. Oqý-aǵartý mınıstrligi bul muǵalimderdiń oqý ortasyn jáne eńbek jaǵdaılaryn jaqsartýǵa baǵyttalǵan keń aýqymdaǵy jalǵyz halyqaralyq zertteý ekenin atap ótti. 2018 jylmen salystyrǵanda pedagogterdi ákimshilik jumystarǵa tartý azaıyp, olar sabaq berýge jáne ata-analarmen, qamqorshylarmen baılanysqa kóbirek ýaqyt bóle bastaǵan. Sondaı-aq mamandyǵyna jáne eńbek jaǵdaıyna qanaǵattaný deńgeıi edáýir artqan.
Odan bólek, zertteý nátıjeleri pedagogterdiń eńbek jaǵdaıynda aıtarlyqtaı oń ózgerister bolǵanyn kórsetedi. О́tken oqý jylynda pedagogterdiń ortasha aptalyq júktemesi 36 saǵatty qurady. Al 2018 jyly bul kórsetkish 50 saǵat bolǵan. Mundaı qysqartý – EYDU elderiniń ishinde erekshe jaǵdaı. Sonymen qatar elimizdegi pedagogterdiń ortasha jasy 41 jasty qurady, bul EYDU-degi ortasha kórsetkishten 4 jasqa tómen.
Mańyzdy nátıjelerdiń taǵy biri – pedagogterdiń eńbek jaǵdaılaryna jáne jalaqysyna qanaǵattanýshylyq deńgeıiniń kóterilýi. Saýalnama derekteri boıynsha, pedagogterdiń 95%-y óz jumysyna kóńili tolatynyn, al 80%-y mamandyqty qaıta tańdasa, qaıtadan muǵalim bolýdy qalaıtynyn aıtqan.
Elimizde «TALIS» zertteýin úılestirýmen Ahmet Baıtursynuly atyndaǵy «Taldaý» ulttyq zertteýler jáne bilimdi baǵalaý ortalyǵy aınalysady.