Inflıasııany tejeý máselesine arnalǵan aptalyq keńeste jyl sońyna deıin ınflıasııany turaqtandyrýǵa qatysty qabyldanatyn sharalar sóz boldy. Búginde jyldyq ınflıasııanyń negizgi qozǵaýshysy aqyly qyzmetter bolyp otyr. Qyrkúıekte aqyly qyzmetterdiń ósý qarqyny báseńdep, tamyzdaǵy 1,4%-ben salystyrǵanda 1%-ǵa deıin tómendegen.
О́ıtkeni bıylǵa josparlanǵan kommýnaldyq qyzmet tarıfterin túzetý sharalary aıaqtaldy. Buǵan deıin aıtylǵandaı, qazan aıynan bastap kommýnaldyq qyzmet tarıfterin kóterý josparda joq.
Áleýmettik mańyzy bar azyq-túlik taýarlarynyń baǵasy da turaqtalyp keledi. Qyrkúıektiń sońǵy aptasynda áleýmettik mańyzy bar azyq-túlik ındeksi óspedi. Qant, tuz, makaron, kúrish, sút jáne áleýmettik mańyzy bar kókónisterdiń baǵasy arzandady. Jalpy, qyrkúıek aıynda nan-toqash ónimderi men jarma baǵasy – 0,1%-ǵa, et jáne et ónimderi – 0,2%-ǵa, maı men toń maı – 0,2%-ǵa, jumyrtqa – 3,1%-ǵa, jemister men kókónister 1,9%-ǵa tómendedi. Qyryqqabat baǵasynyń aıtarlyqtaı tómendeýin erekshe atap ótýge bolady. Onyń baǵasy jyldyń birinshi jartysynda joǵary qarqynmen ósken edi, al mamyr aıymen salystyrǵanda 52%-ǵa arzandady. Sondaı-aq basqa maýsymdyq kókónister men jemisterdiń baǵasy da aıtarlyqtaı tústi.
Saýda jáne ıntegrasııa birinshi vıse-mınıstri Aıjan Bıjanovanyń aıtýynsha, barlyq óńirde otandyq óndirýshilermen áleýmettik mańyzy bar azyq-túlik ónimderiniń baǵasyn jyl sońyna deıin turaqtandyrý týraly kelissóz júrgizildi. Qazan men jeltoqsan aralyǵynda demalys jáne mereke kúnderin qosa alǵanda, el boıynsha aptasyna bir ret jalpy sany 1 619 aýyl sharýashylyǵy jármeńkesi ótedi dep josparlanyp otyr.
Astanadaǵy iri saýda jelileri Aýyl sharýashylyǵy mınıstrligimen birlesip, sıyr etin óndirýshilerden tikeleı satyp alýǵa arnalǵan aksııany sátti ótkizip jatyr. Bul tájirıbe tıimdiligin dáleldep, endi óńirlerge keńinen taratylmaq.
«Bereke Fest» aksııasy aıasynda elimizdiń 80 saýda jelisi agrofırmalarǵa et pen basqa da áleýmettik mańyzdy ónimderdi tikeleı sýpermarket sórelerine jetkizýge múmkindik berdi. Saýda jelileri áleýmettik jaýapkershilik tanytyp, osyndaı ónimder úshin arnaıy buryshtar uıymdastyrdy. Qazir ákimdikter jáne bıznes ókilderimen birlesip, Respýblıka kúnine arnalǵan merekelik jármeńkeler men aksııalardy uıymdastyryp jatyrmyz», dedi A.Bıjanova.
Aýyl sharýashylyǵy mınıstrliginiń málimetinshe, óńirlerdiń basym bóligi turaqtandyrý qorlaryna jańa ónimderdi qabyldaý kelisimderin aıaqtaǵan. Jalpy ónim kólemi – 245 myń tonna, onyń ishinde 146,7 myń tonna kartop, 35,3 myń tonna sábiz, 27,4 myń tonna pııaz jáne 36 myń tonna qyryqqabat bar. Aqtóbe jáne Ulytaý oblystarynda qyryqqabat satyp alý 50%-dan sál ǵana asqan, bul jerde kesheýildeý baıqalady. Vıse-premer mınıstrlikten osy óńirlerge jetkizýshilerdi izdeýge qoldaý kórsetýdi tapsyrdy.