Astanadaǵy Aqbulaq ózeni boıynda erekshe tehnıkalyq saıys ótti. «TWO BRIDGES ENU» atty ashyq kememodeldeý jarysyna elimizdiń alty oblysynan kelgen 10-17 jas aralyǵyndaǵy 40-tan astam oqýshy qatysyp, óz qoldarymen jasaǵan keme úlgilerin tanystyrdy, dep jazady Egemen.kz.
Jarystyń saltanatty ashylýyna L.N.Gýmılev atyndaǵy Eýrazııa ulttyq ýnıversıteti strategııalyq damý jáne ınternasıonaldandyrý jónindegi prorektory Dýman Aıtmaǵambetov, Propilon jobalaý bıýrosynyń negizin qalaýshy ári basshysy, ýnıversıtet túlegi Danııl Logvınenko, Kememodeldeý federasııasynyń prezıdenti Sergeı Okonechnıkov, sondaı-aq «ARNNA MINERALS» kompanııasynyń ókilderi men ýnıversıtet ujymy qatysty.
«Prezıdentimiz elimizge tehnıkalyq baǵyttaǵy mamandar qajet ekenin jıi atap ótedi. Bilikti mamandardyń qalyptasýy dál osyndaı qyzyǵýshylyqtan bastalady. Ýnıversıtetimiz – zertteý baǵytyn ustanatyn joǵary oqý orny, sondyqtan bizge osyndaı izdenimpaz jastar qajet», dedi prorektor Dýman Aıtmaǵambetov.
Jarysty L.N. Gýmılev atyndaǵy Eýrazııa ulttyq ýnıversıteti men Respýblıkalyq qosymsha bilim berý oqý-ádistemelik ortalyǵy uıymdastyrdy. Is-shara Astana qalasy ákimdiginiń qoldaýymen ótti. Bas demeýshi – Propilon, seriktester qatarynda Shaurma Food, Miglior syndy kompanııalar bar.
«Osyndaı saıystardyń sebebimen balalar bos ýaqyttaryn tıimdi ótkizip, óz qolymen jańa nárse jasaýǵa daǵdylanady. Olar áleýmettik jelige telmirip otyrmaı, naqty tehnıkamen aınalysady. Biz dál osy shyǵarmashyl ári izdenimpaz býyndy qoldaýǵa bel býdyq», dedi Propilon basshysy Danııl Logvınenko.
Saıysqa Astana, Aqmola, Qaraǵandy, Pavlodar, Qostanaı jáne Batys Qazaqstan oblystarynan kelgen 8 komanda qatysty. Jas modelıster arasynda erekshe kózge túskenderdiń biri – Aleksandr Zamanov. Ol kememodeldeýmen bes jyldan beri aınalysyp keledi.
«Jasap otyrǵan árbir úlgim men úshin kishkentaı jańalyq sııaqty. Sebebi onyń qurylymyn oılastyryp, qozǵaltqyshyn rettep, sýdyń ústinde qalaı júretinin baqylaý – naǵyz tájirıbe alańy. Bolashaqta osy baǵytta kásibı maman bolýdy armandaımyn», deıdi jas qatysýshy.
Al Batys Qazaqstan oblysynan kelgen Sultanbek Maqsutovtyń aıtýynsha, ol kishkentaı kezinen tehnıkaǵa qumar bolypty. Túrli úı tehnıkalaryn buzyp-jınap, óz betinshe úırengen. Qazir ortalyqta súıikti isimen aınalysyp júr. Bolashaqta IT salasyna bet buryp, óndiristik kemelerdiń úlgilerin jasaýdy armandaıdy. Onyń dosy Jiger Baqtygereev te 12 jasynan beri kememodeldeýmen aınalysyp keledi. Qazir ol mektep bitirgen soń Eýrazııa ulttyq ýnıversıtetine tehnıkalyq mamandyq boıynsha oqýǵa túsýge nıetti.
Terekti aýdanynan kelgen úıirme jetekshisi Manas Aqqojın bul tehnıkalyq ónerdiń jastar arasynda úlken qyzyǵýshylyq týdyryp otyrǵanyn aıtty.
«Keme úlgisin jasaý – bul tehnıkalyq shyǵarmashylyq pen sporttyq básekeni biriktiretin erekshe sala. Qazir álemde tehnıka men qashyqtan basqarylatyn qurylǵylardyń zamany. Mundaı saıystar balalardyń zertteýshilik, tehnıkalyq qabiletterin damytyp, olardy ǵylym men óndiris salasyna baǵyttaıdy. Búginde bizdiń shákirtter el kólemindegi túrli baıqaýlarda júldeli oryn alyp júr», dedi ol.
Saıys qorytyndysy boıynsha birinshi oryndy Qaraǵandy oblysynyń komandasy ıelendi, ekinshi oryn – Batys Qazaqstan oblysyna, al úshinshi oryn – Qostanaı oblysyna buıyrdy. Jeńimpazdar men 15 ónertapqysh arnaıy dıplomdarmen marapattaldy.