Densaýlyq saqtaý mınıstrliginiń málimetinshe, donor aǵzasyna kezekte 4 384 pasıent tur, onyń ishinde - 121 bala bar, dep jazady Egemen.kz.
Pasıentterdiń basym bóligi – búırek transplantasııasyn qajet etetinder. Baýyrdy - 222 pasıent, júrekti – 149, ókpeni – 27, ókpe-júrek keshenin – 6 adam kútip otyr. Jyl saıyn 300-den astam adam transplantasııany kútpeı, ómirden ozady. 2012 jyldan beri Qazaqstanda 3 200-den astam aǵza transplantasııasy jasaldy, olardyń negizgi bóligin tiri donorlardan jasalǵan operasııalar quraıdy. 2023 jyldan bastap konservasııalanǵan móldir qabyqty transplantattaý engizildi, 308 aýystyryp salý operasııasy jasalǵan.
eGov.kz portalynda 135 myńnan astam erik bildirý ótinishteri tirkelgen, biraq olardyń ishinen 10 724 adam ǵana qaıtys bolǵannan keıin donor bolýǵa kelisim bergen. Al 112 myńnan astam adam donor bolýdan bas tartqan.
Donor bolýǵa kelisim bergender arasynda eń joǵary belsendilik Astana men Almaty qalalarynda, sondaı-aq Pavlodar, Aqmola, Shyǵys Qazaqstan, Batys Qazaqstan jáne Jambyl oblystarynda baıqalady. Al Atyraý, Mańǵystaý, Aqtóbe, Qyzylorda jáne Qaraǵandy óńirlerinde kórsetkishter óte tómen deńgeıde qalyp otyr.