Oral qalasynda belgili qalamger, «Qurmet» ordeniniń ıegeri, Qazaqstan Jazýshylar odaǵynyń Batys Qazaqstan oblysyndaǵy ókili Baýyrjan Ǵubaıdýllınniń «Bılenbegen valstiń áýenderi» atty shyǵarmashylyq keshi ótti.
Baýyrjan Faızollauly – belgili balalar jazýshysy, onyń «Kún bala», «Jıhankez Aqkerbez» jınaqtary eń kishkentaı oqyrmandardyń súıikti kitabyna aınalǵan. Aqjaıyq óńiriniń qoǵamdyq-saıası ómirinde óz orny bar azamat shırek ǵasyrdan beri oblystyq «Oral óńiri» gazetin basqaryp, ári Qazaqstan Respýblıkasy Prezıdenti janyndaǵy Ulttyq quryltaı múshesi retinde el men jerdiń máselesine únemi ún qosyp keledi.
Qalamgerdiń shyǵarmashylyq keshine aqyn, Memlekettik syılyqtyń laýreaty Aqushtap Baqtygereeva, ǵalym-jazýshy, M.Áýezov atyndaǵy ádebıet jáne óner ınstıtýtynyń bas ǵylymı qyzmetkeri Nurdáýlet Aqysh, «Egemen Qazaqstan» gazetiniń bas redaktory Ǵabıt Músirep, «Parasat» jýrnalynyń bas redaktory Sáken Sybanbaı syndy mártebeli meımandar qatysty. Parasat maıdanyndaǵy tanymal qalamgerge Mádenıet jáne aqparat mınıstri Aıda Balaevanyń, Qazaqstan Jýrnalıster odaǵynyń tóraǵasy Seıitqazy Mataevtyń alǵyshattary tapsyryldy. Osy keshte avtordyń «Namys naızaǵaıy» atty pýblısıstıkalyq jınaǵynyń tusaýy kesildi.
Baýyrjan Ǵubaıdýllınniń shyǵarmalary álemniń ondaǵan tiline aýdarylǵan. Balalar ádebıetinen bólek, «Janyma jaqyn jaǵalaý», «Bılenbegen vals» syndy týyndylary da oqyrman júreginen laıyqty oryn tapqan. Qalamgerdiń ózi de orys pen arab halyq ertegilerin qazaq tiline aýdaryp, balalar ádebıetiniń damýyna eleýli úles qosty.
– Kóp ýaqytymdy jýrnalıstıkanyń kúıbeń tirligine jumsap, ádebıetke moıyn bura almaǵanym ras. Bastap qoıǵan kólemdi dúnıelerim de bar edi. Búgin oqyrmanymnyń aldynda oıymda júrgen jańa shyǵarmalarymdy qolǵa alýǵa sóz beremin, – dedi jazýshy tolqyp turyp.
Batys Qazaqstan oblysy