Elimizde keıingi bes jylda 49 eskertkish zań talaptaryn saqtamaı ornatylǵan. Eń kóp zańsyzdyq Túrkistan (17) jáne Qostanaı (15) oblysynda tirkelgen. Bul týraly Mádenıet jáne aqparat mınıstri Aıda Balaeva áleýmettik jelidegi paraqshasynda jazdy.
Mınıstr Facebook-tegi jazbasynda aldymen jýyrda birtýar kompozıtor Nurǵısa Tilendıevtiń týǵanyna 100 jyl tolýyna oraı eskertkishi boı kótergenin jáne jańa mádenıet úıi ashylǵanyn jetkizdi.
Sondaı-aq A.Balaeva elimizdegi eskertkish ornatý máselesine toqtaldy. Onyń aıtýynsha, zańsyz eskertkishter tipti respýblıkalyq komıssııa qoldamasa da, óz betimen ornatylǵan. Ári ol keıbir eskertkishter jekemenshik aýmaqtarǵa qoıylyp, tipti eskertkish pen shaǵyn arhıtektýralyq nysannyń aıyrmasy múlde eskerilmeı jatatynyn synǵa aldy.
«Eskertkish ornatý – tek yqylas pen nıet emes, eń aldymen tártip pen jaýapkershilik ekenin eskerý kerek. Ásirese ıgi nıetpen qoldaý bildirip júrgen demeýshiler, mesenattar bul máseleni udaıy nazarda ustasa deımiz. Al jergilikti atqarýshy organdar zańsyzdyqqa jol bermeı, qatań baqylaýǵa alýy kerek. «Tarıhı-mádenı mura obektilerin qorǵaý jáne paıdalaný týraly» zańǵa sáıkes, árbir jańa eskertkish monýmentaldy óner qurylystaryn ornatý jumystaryn oblystardyń, respýblıkalyq mańyzy bar qalalardyń jáne astananyń jergilikti atqarýshy organdary júzege asyrady. Monýmentaldy óner qurylystaryn ornatý tártibi mınıstrlik qaǵıdalarmen rettelgen. Sonymen qatar Ákimshilik quqyq buzýshylyq týraly kodekste monýmentaldy óner nysandaryn ornatý erejesin buzǵandarǵa aıyppul qarastyrylǵan. Naqtyraq aıtqanda, jeke tulǵalarǵa – 10, laýazymdy tulǵalar men shaǵyn kásipkerlik sýbektilerine – 50, orta kásipkerlik sýbektilerine – 100, iri kásipkerlik sýbektilerine – 250 aılyq eseptik kórsetkish kóleminde, sondaı-aq júrgizilip jatqan jumystardy ýaqytsha toqtatý qarastyrylǵan. Keı jaǵdaılarda eskertkishter jekemenshik aýmaqtarǵa ornatylyp, qoǵamdyq keńistiktiń estetıkalyq kelbeti eskerilmeı jatady. Munyń bári túptep kelgende tarıhı tulǵalarǵa degen qurmettiń laıyqty deńgeıde kórinis tabýyna keri áserin tıgizedi. Tarıhqa adaldyq tártipten bastalady. О́ıtkeni eskertkish – ótkenge qurmet belgisi ǵana emes, keler urpaqqa degen ortaq amanatymyz», dedi mınıstr.
Aıta keteıik, zańsyzdyqtar mınıstrlik júrgizgen taldaý barysynda belgili bolǵan.