«Syrdarııa-Túrkistan memlekettik óńirlik tabıǵı parki» KMM-niń memlekettik ınspektorlary arnaıy reıd barysynda erekshe qorǵalatyn tabıǵı aýmaqqa jatatyn jerden zańsyz ań aýlaý oqıǵasyn anyqtaǵan, dep jazady Egemen.kz.
Otyrar aýdanynyń 3 turǵyny atalǵan aýmaqtan qaban aýlaǵan. Kúdiktilerden aıǵaq retinde alynǵan 2 myltyq, 4 jaryq shamy Otyrar aýdandyq polısııa bólimine (APB) tıisti sheshim qabyldaý úshin ótkizilip otyr.
«Erekshe qorǵalatyn tabıǵı aýmaqtarda zańsyz ańshylyq etken azamattar QR ÁQBtK-niń baptaryna sáıkes 70 AEK kólemindegi aıyppul arqalaýy múmkin. Al «qaban» janýaryn zańsyz oljalaý úshin keltirilgen zalal sommasy 250 AEK teń. Sondaı-aq toppen ańshylyq jasaý áreketteri QR QK-ne sáıkes qylmystyq jaýapkershilikke tartylady», delingen atalǵan tabıǵı park habarlamasynda.