Ortalyq kommýnıkasııalar qyzmetinde «QTJ» UK» AQ – «Kóliktik logıstıka damý ortalyǵy» fılıaly dırektorynyń orynbasary Ábdirashıd Sákenov pen «KTZExpress» AQ vıse prezıdenti Sergeı Anashkın brıfıng ótkizdi. Onda Memleket basshysynyń «Nurly Jol» Joldaýynda júktelgen tapsyrmalardyń oryndalý barysy sóz boldy.
Búginde kóliktik-logıstıkanyń ınfraqurylymdy damytýǵa baǵyttalǵan keshendi jobalar júzege asyryla bastady. Onyń ishinde Quryq portyndaǵy temirjol parom kesheni Kaspıı óńirine jańa múmkindikter týǵyzady. Quryq porty halyqaralyq kóliktik-logıstıkalyq tizbektiń, eksport pen ımport, tranzıttik júkterdiń Qazaqstan aýmaǵy arqyly molynan ótýine yqpal etedi. Al, Lıanıýngan portyndaǵy Qazaqstan-Qytaı termınaly syrtqy aýmaqtardan logıstıkalyq ortalyqtardyń qurylysyn júrgizý nemese jalǵa alý jobalaryn júzege asyrýǵa bolatyndyǵyn bildirip otyr. Máselen, qazirgi tańda Iаntıen teńiz portynda, Sıan men Chjenchjoý qurǵaq portynda 2 mln. tonna júk óńdeýge múmkindik týdy. Endi Baltyq jaǵalaýy portynda jylyna 1,7 mln. tonna júk ótkizetin termınal jobalanýda. Osy jetistikterge toqtalǵan Á.Sákenov, el aýmaǵyndaǵy tabystarǵa da oıysty.
«Qorǵas-Shyǵys qaqpasy» AEA ǵajaıyp memlekettik ınfraqurylymdyq jobasy qurǵaq porty Qytaı, Ortalyq Azııa, Parsy shyǵanaǵy, Kavkaz, Túrkııa naryqtaryna júk shyǵarady. 2015 jylǵy shildede «Qurǵaq port» jobasyn kommersııalyq paıdalanýǵa tapsyrý josparlanyp otyr. Al, Astana halyqaralyq áýejaıy jolaýshylar termınalyn jańǵyrtý jobasyn júzege asyrýǵa daıyndyq jumystary bastaldy. Bul joba áýejaıdyń tranzıttik áleýetin arttyrady. Termınal iske qosylǵan kezde onyń aýmaǵy 25-ten 40 myń sharshy metrge ulǵaıady. Saǵatyna 1775 jolaýshy ótkize alady», dedi spıker.
Temirjolshylar daǵdarysqa qarsy kóliktik-logıstıkalyq saladaǵy jobalardy júzege asyryp, Qazaqstannyń ishki áleýetin damytpaq. Ol arqyly elimizdiń ishki jáne syrtqy naryqta termınaldyq jelini damytý kózdelýde. Nátıjesinde 2020 jylǵa deıin, tasymaldaý kólemi, onyń ishinde tranzıttik tasymal eki esege artatyn bolady. Sondaı-aq, atalǵan jobalar júzege asqanda jańadan 20 myń jumys orny ashylady eken.