Memleket basshysy Qasym-Jomart Toqaev «Memleket turǵyn úı qurylysyn damytyp, baspanany qoljetimdi etý úshin tıisti sharalar qabyldaıdy» degen bolatyn. Jergilikti jerde osy tapsyrmaǵa sáıkes ıgilikti ister júzege asyrylýda, dep jazady Egemen.kz.
Kókshetaýda ákimdik pen «Otbasy» bank birlesip jańa baǵdarlamany júzege asyrdy. Bul ıgi is osy taraptyń alǵashqy qarlyǵashy ispetti. Búgin 21 otbasy óz páterleriniń kiltin aldy. Aldaǵy ýaqytta taǵy 47 páter kilti tabys etiledi.
Turǵyndarǵa páterlerdiń kiltin tapsyrý saltanaty kezinde oblys ákiminiń orynbasary Altynaı Ámirenova turǵyn úımen qamtamasyz etý memlekettik saıasattyń basym baǵyttarynyń biri ekendigine toqtalyp ótti.
«Bul – Otbasy bankiniń tolyq avtomattandyrylǵan rejımde ótkizgen alǵashqy nesıelik turǵyn úıdi bólýi. Adam faktory tolyǵymen alynyp tastaldy – júıe qatysýshylardy ózdiginen anyqtaıdy, kezekke qoıylǵan kún men kezekte turǵan azamattyń sanatyn eskeredi. Odan keıin tabys deńgeıi tekserilip, usynylǵan páterdi qabyldaýǵa daıyn ekendigi rastalady. Osylaısha, barlyq prosess barynsha ashyq jáne ádil júrgiziledi», dep atap ótti «Otbasy banki» AQ Aqmola oblystyq fılıalynyń dırektory Almat Nurahmetov.
Birinshi kezekte sharshy metrler azamattardyń basym sanattary arasynda bólindi. Olar – UOS ardagerleri men olarǵa teńestirilgen tulǵalar, ózge memleketterdiń aýmaǵyndaǵy soǵys qımyldaryna qatysqan ardagerler, jetim balalar men ata-anasynyń qamqorlyǵynsyz qalǵan balalar, kópbalaly otbasylar, I jáne II toptaǵy múgedektigi bar adamdar, erekshe qajettilikteri bar balalardy tárbıelep otyrǵan otbasylar, sondaı-aq jesirler men jesir erler.
Olarǵa turǵyn úıdiń jalpy kóleminiń keminde 70%-y berildi. Onyń ishinde 20%-y jetim balalar arasynda bólindi. Qalǵan 30% páter ózge kezekte turǵan azamattar arasynda taratyldy.
Sharttar barynsha qolaıly – nesıe jyldyq 2% (JTSM 2%-dan 2,1%-ǵa deıin) jáne 5% (JTSM 5,2%-dan 5,8%-ǵa deıin) mólsherlemelermen, bastapqy jarna nebári 10% kóleminde tólenedi.
«Memlekettiń qamqorlyǵyna dán rızamyz. Otbasy bankiniń bul bastamasy qarapaıym halyq úshin óte qolaıly. Turǵyn úıdiń bir sharshy metri 261 225 teńgeden kelip otyr. Bir jaqsysy, barlyq páterlerge jóndeý jumystary jasalǵan, tek jıhazdaryńyzdy alyp kelseńiz boldy. Sý, jylý, elektr qýaty, gaz tartylǵan», deıdi qala turǵyny Álııa Beısembaeva.
Jańa páterge ıe bolǵandardyń arasynda on jyldap kezekte turǵandar bar eken.
«Men 18 jyl boıy kezekte turdym, sondyqtan kópten kútken qýanysh bolyp otyr. Qarapaıym halyqty osyndaı qamqorlyǵyna bólegen Memleket basshysyna aq alǵysymyzdy aıtqymyz keledi», deıdi jańa páterge ıe bolǵandardyń biri Janat Nyǵmetjanqyzy.
Qonys toıyna jınalǵan halyq páterlerdi aralap kórip, sapasyna kóńilderi tolatynyn aıtyp jatyr. Ájeler shashý shashyp, atalar batasyn berýde. Baspananyń baqyt kilti ekendigi de ras.
«Úsh jerde jumys istedim. Sonda da úı satyp alýǵa qarajat jınaı almadym. Bizdiń óńirde tuńǵysh ret qolǵa alynǵan osy bastama qarapaıym adamdardyń baspanaly bolýyna jaǵdaı týdyryp otyr. Qolymda qart anam bar. Baspanaǵa qol jetkizemin dep qara jumys isteýden arlanǵan joqpyn. Eden de jýdym, keńselerdi tazartýmen de aınalystym», deıdi qýanyshqa kenelgenderdiń biri Álııa Baıakına.
Kókshedegi qonys toıy qarapaıym kópshiliktiń kókirekterine nur sáýlesin quıǵan, aq túıeniń qarny jarylǵan kún boldy.