«Kazakh Tourism» ulttyq kompanııasynyń málimetinshe, Qazaqstan Qytaıdyń týrızm naryǵynda óz ornyn nyǵaıtyp keledi. Elimiz QHR-dyń eń iri onlaın-týrıstik kompanııalarynyń biri Tongcheng Travel derekteri boıynsha, Qytaıdyń Ulttyq kúni men Kúz ortasy merekesine oraılastyrylǵan segiz kúndik demalys kezinde qonaq úı brondaý qarqyny eń joǵary ósken sheteldik baǵyttar arasynan alǵashqy bestikke endi, dep habarlaıdy Egemen.kz.
Bıyl Qytaıda shetelge baǵyttalǵan alys qashyqtyqtaǵy toptyq týrlarǵa suranys aıtarlyqtaı artqan. О́tken jylmen salystyrǵanda olardyń sany eki esege jýyq kóbeıgen. Demalys kúnderi QHR týrısteri tarapynan Ortalyq Azııa, Taıaý Shyǵys jáne Afrıka elderindegi halyqaralyq qonaq úılerdi brondaý edáýir ulǵaıdy. Suranysy shapshań ósken bes el qatarynda Saýd Arabııasy, Mysyr, Jańa Zelandııa, Qazaqstan jáne Birikken Arab Ámirlikteri bar.
«Qazaqstan men Qytaı arasyndaǵy týrıstik almasý turaqty ósip keledi. Bıylǵy 9 aıda Qytaıdan kelgen týrıster sany 675 myńnan asty. О́tken jyly bul kórsetkish 12 aıda 655 myń bolǵan edi. Bul elimizge degen joǵary qyzyǵýshylyqty jáne Qazaqstandy Qytaı naryǵynda ilgeriletý, vızalyq rásimderdi jeńildetý men tikeleı áýe qatynasyn keńeıtý baǵytynda atqarylyp jatqan júıeli jumystyń nátıjeli ekenin kórsetedi», dedi «Kazakh Tourism» AQ basqarma tóraǵasynyń m.a. Danıel Serjanuly.
Sondaı-aq ulttyq kompanııanyń málimetine sáıkes, Qytaıdyń eń iri izdeý júıesi Baidu-daǵy derekter boıynsha, 2025 jylǵy qyrkúıek aıynda Qazaqstan týraly táýligine orta eseppen 420–430 myń izdeý suranysy tirkelgen. Eń belsendi izdeý júrgizgen óńirlerge Gýandýn men Chjeszıan provınsııalary, Beıjiń qalasy, sondaı-aq Shyńjań Uıǵyr avtonomııalyq aýdany men Shandýn provınsııasy jatady. Bul Qazaqstanǵa degen qyzyǵýshylyq tek shekara mańyndaǵy aımaqtarmen shektelmeı, Qytaıdyń ekonomıkalyq turǵydan damyǵan óńirlerin de qamtyp otyrǵanyn aıǵaqtaıdy.