10–13 qazan aralyǵynda Máskeý qalasynda Qazaqstannyń Reseıdegi mádenı kúnderi uıymdastyrylady, dep jazady Egemen.kz.
Eki el arasyndaǵy mádenı baılanysty odan ári nyǵaıtý aıasynda birshama mańyzdy is-sharalar josparlanǵan.
Mádenıet jáne aqparat mınıstrliginiń málimetinshe, 10 qazan – 23 qarasha aralyǵynda Jańa Tretıakov galereıasynda «Qazaqstan óneriniń jaýharlary» kórmesi ótedi. Á. Qasteev atyndaǵy QR Memlekettik óner mýzeıiniń kolleksııasynan Qazaqstannyń jetekshi qylqalam sheberleriniń 43 týyndysy qoıylady. Sonymen qatar kelýshiler Memlekettik Tretıakov galereıasynyń qorynan alynǵan 17 keskindeme men 11 músin jumysyn tamashalaı alady.
Mádenı kúnder aıasynda otandyq kınotýyndylar da kórsetiledi. 10 qazan kúni Máskeýdegi «Poklonka» kınoteatrynda rejısser S. О́tepbergenovtyń «Patrıottar ýaqyty» atty áskerı ekshn fılmi jáne rejısser B.Shekerovtyń «1941 jyldyń jazy» kınokartınasy, 11 qazanda atalǵan kınoteatrda rejısser F.Sháripovtyń «Toqta, tún» fılmi kórsetilse, keshke rejısser A.Sahamannyń «Dos-Muqasan» fılmi usynylady.
12 qazan kúni máskeýlik kórermen rejısser M. Turdybektiń ejelgi saqtardyń kıeli tarıhyn, turmysy men mádenıetin, áskerı ónerinen syr shertetin «Altyn adam» tolyqmetrajdy anımasııalyq fılmin tamashalaı alady. Keshki bólimde rejısser T. Dýlatovtyń «90+1» fılmi kórsetiledi.
Teatrsúıer qaýym úshin 13 qazan kúni Reseı memlekettik akademııalyq kishi teatrynda Qalıbek Qýanyshbaev atyndaǵy Qazaq ulttyq mýzykalyq drama teatrynyń «Parasat maıdany» qoıylymy sahnalanady.
12 qarasha kúni Reseıdiń memlekettik akademııalyq Úlken teatrynda Qazaqstan ónerpazdarynyń qatysýymen gala-konsert ótedi. Is-shara Qazaqstan Respýblıkasynyń Prezıdenti Qasym-Jomart Toqaevtyń Reseı Federasııasyna memlekettik sapary aıasynda uıymdastyrylady. Mádenı kúnder aıasynda ótetin is-sharalarǵa Reseı men Qazaqstannyń zııaly qaýym ókilderi, ǵalymdar, jazýshylar, dıplomatııalyq korpýs pen shyǵarmashylyq odaqtar, sondaı-aq qazaq dıasporasynyń ókilderi qatysady.
Is-sharalar Qazaqstan Respýblıkasy Mádenıet jáne aqparat mınıstrliginiń uıymdastyrýymen Reseı Mádenıet mınıstrliginiń qoldaýymen ótedi.