Vıse-premer – Ulttyq ekonomıka mınıstri Serik Jumanǵarın memlekettik organdar, Shekara qyzmeti, Syrtqy ister mınıstrligi, IIM Kóshi-qon qyzmeti komıteti basshylarynyń, shekara mańy óńirleri ákimderi orynbasarlarynyń jáne Májilis depýtatynyń qatysýymen jedel keńes ótkizdi. Jıynda Reseı Federasııasyna kirý kezindegi ótkizý pýnktterinde júk kólikteriniń turyp qalýy jáne bul elde kóshi-qon zańnamasy jańa normalarynyń qoldanylýyna baılanysty júrgizýshilerdiń shaǵymy talqylandy.
2025 jyldyń 1 qańtarynan bastap Reseıde kúshine engen zańǵa sáıkes sheteldik azamattar kirý jáne shyǵý sanyna qaramastan, jyl ishinde 90 kúnnen aspaıtyn merzimde tirkeýsiz Reseı Federasııasynyń aýmaǵynda bola alady. Buryn bul merzim bir jyl ishinde 180 kún bolǵan. Bul shekteý halyqaralyq júk pen jolaýshy tasymalyn júzege asyratyn júrgizýshilerge de qoldanylady. Sonymen qatar Reseı men Belarýs aýmaǵynda bolý jalpy esepke alynady. О́ıtkeni atalǵan elder odaqtas memleket sanalady.
Bul norma Qazaqstan, Armenııa, Ázerbaıjan, Qyrǵyzstan, О́zbekstan men basqalardy qosqanda, vızasyz elderdiń birazyna qoldanylady. Sonymen qatar UQK Shekara qyzmetinde naqtylanǵandaı, eger sheteldik azamat turýǵa yqtııarhat, ruqsat nemese ýaqytsha turýǵa ótinish sııaqty ruqsat qujatyn rásimdegen bolsa, bolý merzimi esepke alynbaıdy.
Elimizde sheteldik azamattardyń osyǵan uqsas tirkeýsiz bolý talaby – alty aı ishinde 90 kún. Ol halyqaralyq júk jáne avtobýs reısin oryndaıtyn júrgizýshilerge qoldanylmaıdy. Bul halyqaralyq tájirıbege sáıkes.
Osy jyly qyrkúıekten bastap Reseı tarapynan kóleńkeli ımportty anyqtaý boıynsha júrgizip jatqan reıd jaǵdaıdy ýshyqtyrǵan. Qosymsha tekserý saldarynan keıbir ótkizý pýnktterinde júk kóligin tekserý ýaqyty artty. Májilis depýtaty Bolatbek Nájimetdınuly kóshi-qon zańnamasynyń jańa erejeleriniń qoldanysyna is júzinde halyqaralyq tasymaldaýshylar ǵana emes, EAEO elderiniń ishinde jumys isteıtin júrgizýshiler de kirgenin atap ótti.
Belgilengen 90 kúndik shektik mejeden asqan keıbireýler ustaldy jáne kóshi-qon zańnamasynyń jańa normalaryn buzýǵa baılanysty elden ketý qajettiligi týraly habarlama aldy. Bizdiń tarap reseılik áriptesterimen túrli deńgeıde kelissózder júrgizip jatyr. Jýyrda Serik Jumanǵarın bul máseleni Reseı Federasııasynyń Qazaqstandaǵy Tótenshe jáne ókiletti elshisi Alekseı Borodavkınmen kezdesýde atap ótti. Eki tarap týyndaǵan qıyndyqty birlesip jedel retteýge daıyn ekenin bildirdi. EEK-ke qalyptasqan jaǵdaıdy syrtqy saýdaǵa kedergi keltiretin tosqaýyl dep taný týraly resmı ótinish joldandy. Bul másele 13 qazanda EEK alańynda jáne 7 qarashada Qazaqstan men Reseı arasyndaǵy yntymaqtastyq jónindegi Úkimetaralyq komıssııanyń 26-otyrysynda qaralady.