QR Parlament Májilisiniń depýtaty Bolatbek Álıev Qazaqstan Úkimeti Reseı tarapymen jedel kelissózder júrgizip, halyqaralyq tasymal júrgizýshilerine qatysty jańa kóshi-qon shekteýleriniń joıylǵanyn habarlady. Bul sheshimniń arqasynda myńdaǵan júrgizýshi jumys ornyn saqtap qaldy, dep jazady Egemen.kz.
Reseıde Qazaqstan azamattaryn ustaý jaǵdaılary kóbeıip jatyr. Kórshi elge júk tasymaldap, nápaqasyn taýyp júrgen qazaqstandyq júrgizýshiler jumyssyz qalýy múmkin edi.
Májilis depýtaty óziniń Facebook paraqshasynda jazǵandaı, birneshe kúndik qarqyndy jumystyń nátıjesinde Qazaqstan Úkimeti Reseı Federasııasyndaǵy áriptesterimen kelisimge kelip, halyqaralyq júk jáne jolaýshylar tasymalymen aınalysatyn júrgizýshilerge jańa kóshi-qon shekteýleri qoldanylmaıtyn boldy.
Bul sheshimniń nátıjesinde:
qazaqstandyq júrgizýshiler bul elde 90 kúnnen artyq bola alady;
jappaı deportasııa men aıyppuldar toqtatyldy;
shaǵyn avtokásiporyndardaǵy myńdaǵan jumys orny saqtaldy.
Depýtattyń aıtýynsha, júrgizýshiler — óz isiniń kásibı elıtasy. Olar halyqaralyq tasymal júıesin jetik meńgerip, el ekonomıkasynyń turaqtylyǵyna tikeleı úles qosyp keledi.
«Bul jaı ǵana júrgizýshiler emes — joǵary deńgeıdegi kásibı mamandar. Eger bul salany joǵaltsaq, onda tutas kásibı qaýymdy joǵaltamyz. Sondyqtan memleket óz azamattaryn qorǵaýy tıis», dep jazdy depýtat.
Sonymen qatar ol Úkimet pen Májilistiń úılesimdi jumysynyń arqasynda ýaqytsha sheshim qabyldanyp, qazaqstandyq tasymaldaýshylardy Reseıdiń jańa erejelerinen shyǵarý múmkin bolǵanyn atap ótti.
«Qazaqstan óz azamattaryn tastamaıdy. Mundaı sheshimder Eýrazııalyq ekonomıkalyq odaq aıasynda aldyn ala kelisilip qabyldanýy tıis. Sebebi Odaq – bul tosqaýyldar orny emes, erkindik pen ózara qurmet keńistigi», dep túıindedi depýtat.
Aıta keteıik, bıyl jyl basynda jańa mıgrasııalyq erejeler kúshine engen. Endi shetel azamattary, sonyń ishinde qazaqstandyqtar da, Reseı aýmaǵynda bir jylda 90 kúnnen artyq bola almaıdy. Osy talaptyń kesirinen ondaǵan júrgizýshige aıyppul salynyp, deportasııa jarııalandy, tipti keıbiri qamaýǵa alynǵan.