Majarstanda ótken aradgerler arasyndaǵy álem chempıonatynda 130 kg salmaq dárejesinde kúsh synasqan qazaqtyń tanymal erkin kúres sheberi Nurjan Qataev barlyq qarsylasyn sypara utyp, bas júldeni oljalady, dep habarlaıdy Egemen.kz.
Bul kúnderi 40-tyń qyrqasynan asqan Nurjan kezinde elimizdiń beldi balýandarynyń biri boldy. Ol 1999 jyly jasóspirimderdiń álem birinshiliginde top jarsa, 2000 jyly jastar arasynda Azııa chempıony atandy. Eresekter arasynda Azııa chempıonatynda bes ret jeńis tuǵyryna kóterildi. 2006 jyly Almatyda altyn alsa, 2005 pen 2010 jyldary kúmispen kúpteldi. Al 2003 jáne 2007 jyldardaǵy jarysty qola medalmen qorytyndylady. Odan bólek, Qataev birqatar asa iri halyqaralyq jarystarda júldeli oryndardy ıelendi.
Kásibı sportshy retinde mansabyn aıaqtaǵannan keıin Nurjan birqatar mekemelerde basshylyq qyzmet atqardy. Bul kúnderi ol – Qazaqstan kúres federasııasynyń vıse-prezıdenti. Sonymen qatar, sportty ómirlik serigine aınaldyrǵan qazaqtyń nar tulǵaly azamaty áli de jattyǵýdan qol úzgen joq. Qataev túrli jarystarda jıi boı kórsetýde. Mine, keshe ǵana ol ardagerler arasynda álem chempıony atandy.