Oǵan «Túrki mádenıeti jáne murasy» qorynyń prezıdenti Aqtoty Raıymqulova, Túrkııa, Ázerbaıjan, Qyrǵyzstan, О́zbekstan jáne otandyq belgili ǵalymdar, zertteýshiler, mádenıet pen óner maıtalmandary, zııaly qaýym ókilderi, qoǵam qaıratkerleri qatysty.
Aımaq basshysy Nurlybek Nálibaev festıvaldiń túrki halyqtarynyń mádenı baılanysyn nyǵaıtýdaǵy jáne ulttyq ónerdi dáripteýdegi mańyzyn atap ótip, baýyrlas elderden kelgen qonaqtarǵa alǵysyn bildirdi.
«Prezıdentimiz Qasym-Jomart Kemeluly kúni keshe Ázerbaıjan Respýblıkasynyń Gabala qalasynda ótken Túrki memleketteri uıymynyń 12-shi sammıtinde: «Túbi bir túrki jurtynyń tarıhy tamyrlas, halyqtarymyzǵa ortaq san ǵasyrlyq shejiremiz bar dep únemi aıtyp jatyrmyz. Munyń bári – berekeli birligimiz ben máńgilik yntymaǵymyzdyń altyn arqaýy», – degen bolatyn.
Baýyrlas halyqtardyń rýhyn kóterý, folklorlyq-mýzykalyq ónerin dáripteý, ózara mádenı baılanysyn nyǵaıtýda festıvaldiń mańyzy zor.
Qorqyt baba muralarynyń Birikken Ulttar Uıymy janyndaǵy IýNESKO-nyń ǵalamdyq materıaldyq emes muralar tizimine engizilýi – jyldar boıy birlesip atqarǵan jumysymyzdyń nátıjeli jemisi.
Kúlli túrki dúnıesiniń nazaryn ózine aýdarǵan, keń dalany jyrǵa bólep, nurǵa toltyrǵan bul dástúrli óner merekesi – ulttyq rýhymyzdyń, túrki jurtynyń máńgilik murasy men mádenı sabaqtastyǵynyń jarqyn kórinisi.
Túrki halyqtarynyń birligi men rýhanı tutastyǵy nyǵaıa bersin! Táýelsiz elimizdiń tuǵyry bıik, egemendigi eńseli bolǵaı!», – dedi Nurlybek Mashbekuly.
«Túrki mádenıeti jáne murasy» qorynyń prezıdenti Aqtoty Raıymqulova túbi bir túrki týystardyń basyn qosqan halyqaralyq is-sharany joǵary deńgeıde uıymdastyrǵan Qyzylorda oblysynyń basshylyǵyna alǵysyn aıtty.
Konsertte áıgili jyraýlar men jyrshylardyń qaıtalanbas maqamdaryn búginge jetkizgen, ulttyq ónerimizdiń shynaıy nasıhatshylaryna aınalǵan Syr súleıleriniń izbasarlary Elmura Jańabergen, Uljan Baıbosynova, Aqmaral Noǵaıbaeva, Sholpan Bımbetova, Maıra Sársenbaeva, Serik Jaqsyǵulov, Kúnsulý Túrikpen, Bısembek Tóleýbaı jáne Jetisý jyr mektebiniń túlegi Nurjan Janpeıisov, Arqa mektebiniń ókili Birjan Esjanov, Saltanat Ersultan jyrdan shashý shashty.
Reseı Federasııasynyń Altaı Respýblıkasynan kelgen Ýrmat Yntaev, Aıdyn Orsýlov tabıǵatqa, ata-baba rýhyna jáne erlik jyrlaryna negizdelgen kóshpeli halyqtyń áýeni óz bolmysyn joǵaltpaǵanyn taǵy bir kórsetti. Kómeımen aıtý óneri men topshýr, qobyz sııaqty kóne aspaptardyń úni Altaı halyqtarynda áli kúnge deıin saqtalǵan. Bul áýender taýdyń jelin, ózen sýynyń syldyryn jáne malshy ómiriniń tynysyn beıneleıdi.
Ázerbaıjannan kelgen «Karabah» muǵamshylar toby ulttyq naqyshtaǵy kúrdeli áýen órnekterin oryndap, kórermendi erekshe áserge bóledi. Qyrǵyz eliniń qomyzshylar ansambli men Samat Kocherbaev «Aqaq» shyǵarmasyn oryndap, túrki halyqtarynyń kóne saz murasyn jańǵyrtty.
О́zbekstannyń «Shashmaqom» ansambli men bıshiler toby ulttyq ónerdiń úzdik úlgisin sahnaǵa shyǵardy. Almaty qalasynan kelgen «Arqaıym» neo-etno folklorlyq ansambli «Tengır Azýn» shyǵarmasyn oryndap, eski saryndy zamanaýı tásilmen úılestirdi.
Kóne túrikterdiń kómeımen án salý dástúri Tyva halyqtarynda jaqsy saqtalǵan. Olar kómeımen án salýdy «hoomeı» dep ataıdy. Yqylym zamannyń mura ónerin saqtap qalǵan halyqtyń «Esh» folklorlyq dýeti de búgingi festıvaldiń qurmetti qonaǵy boldy. Túrkııa Respýblıkasynan kelgen Sınan Barysh, Kamber Nardyń ónerine kórermen erekshe qoshemet kórsetti.
Halyqaralyq festıval búgingi túrki mádenıeti men mýzykasy ortaq tarıh pen rýhanı tamyrdan nár alǵanyn, týys halyqtardyń ánderi men áýenderi bir-birimen úndesip, baýyrlas elderdiń birligin kúsheıtetinin taǵy bir dáleldedi.