Ermek Imanzaıyp ata-babadan qalǵan asyl óner – qus pen ań aýlaýdy jas urpaqqa talmaı úıretip kele jatqan pedagog. Jas muǵalim búginde qala balalaryn da saıatshylyq isine baýlyp júr.
Ol búginde Pavlodar joǵary ınnovasııalyq kópsalaly kolledjinde dene tárbıesi muǵalimi bolyp isteıdi. Ustazdyq etkenine nebári eki jyldaı ýaqyt ótse de, Ermek Imanzaıypulynyń bala shaqtan meńgergen saıatshylyq qyryn oblys ortalyǵyndaǵy áriptesteri keńinen tanı bastady. Bul óner oǵan ákesi, ataqty qusbegi Imanzaıyp Matanulynan daryǵan. Kezinde Baıanaýylda turǵan saıatshy qusty, qazaq tazylaryn baýlýdan el aldyna túsip, talaı dúbirli dodalarda top jarǵan.
– Ertis-Baıan óńirinde esimi ańyz bolyp qalǵan keremet ańshylar bolǵan. Solardyń ishindegi eń irisi Máýııa Ábikeev atamyz edi. Ańshylyqpen, sonyń ishinde qusbegilikpen kásip retinde aınalysyp, «KSRO ańshylyq isiniń úzdigi» atanǵan eken. Ákem ol kisini áýlıe tutty, jasaǵan isterinen ónege aldy. Saıatshylyq degen qanmen keletin dúnıe eken. Toǵyz jasymnan bastap men de saıat qustaryn baptaýmen shuǵyldanyp, ákemnen qusbegiliktiń qyr-syryn meńgerdim. Bala kezimnen respýblıkalyq jarystarǵa qatysyp, júldeli oryndarǵa ıe boldym. Qusbegilik ónerin damytyp qana qoımaı, ony jastarǵa úıretýdi ózine maqsat etip qoıǵan edim. Búginde sol maqsatym az da bolsa oryndalyp kele jatyr, – dep óz oı-armanymen bólisti jas ustaz.
Ermek qusbegilikti ata-babadan jalǵasyp kele jatqan ulttyq muramyz dep baǵalaı otyryp, bolashaq urpaqqa nasıhattaý isine úles qosyp keledi. Kolledjdegi dene shynyqtyrý sabaqtarynan tys kezde balalardy jınap alyp, búrkit pen suńqardy baptaýdyń qyr-syryn áńgimeleıdi. Árıne qalaly jerde ań qaǵýdyń reti joq. Onyń ústine Ertis ózeniniń qaýmalynda ańshylyqqa tyıym salynǵan. Amalsyzdan qustaryn tek sporttyq baǵytta ǵana baptap, shahar mańynda shyrǵaǵa salyp jattyqtyrady.
«О́zim páterde turamyn. Ondaı jerde qusty ustaý árıne yńǵaısyz. Sondyqtan «Tebegen» degen búrkitim men «Shyraq» dep ataıtyn suńqarymdy qaladaǵy týysymnyń jer úıinde ustaımyn. Suńqardyń dene bitimi shaǵyn bolýyna oraı balalardy qusbegilikke úıretýde taptyrmaıtyn qus. Ári oqýshylardyń kóbi búrkittiń turqyna qarap seskenedi, jaqyndaýǵa qorqady. Sondyqtan balalar úshin suńqar qolaıly. «Tebegen» ákemnen qalǵan, qusbegiler arasynda ótetin jarystarǵa únemi sonymen baryp júrmin. Ulttyq ónerimiz keńinen qanat jaıýy úshin qalaly jerlerde qusbegiler úshin jaǵdaılar jasalsa deımin. Qustardy ustaıtyn, baptaıtyn arnaıy oryndar jasalyp, mektepterde arnaıy sabaq ótkizýge múmkindik berilse. Qazirgi dene tárbıesi sabaqtarynda toǵyzqumalaqqa, asyq atýǵa aıryqsha kóńil bólinip, oqýshylar qyzyǵa oınaıdy. Al qusbegilikke qyzyǵýshylyǵy bar balalarǵa ondaı múmkindik joq. Sondyqtan bilim salasyna jaýapty organdar osy máseleni eskerse eken», degen ótinishin jetkizdi.
Osy ýaqytqa deıin Ermek Imanzaıypuly qusbegilerdiń kóptegen respýblıkalyq jarysyna qatysyp, júldeli bolǵan. 2024 jáne 2025 jylǵy Qazaqstan chempıonatynda kúmis júldeger atandy. Ár jarys – ol úshin tájirıbe jınaý alańy. Jýyqta ǵana ol Astanada ótken dúbirli dodaǵa búrkitimen baryp, úshinshi orynnan kórindi. Aldaǵy qysta kemi 4-5 jarysqa qatysatyn oıy bar.
Qusbegilik ónerdiń nárin qalaly jerdegi balalardyń boıyna eksem degen entýzıast jannyń ynta-jigeri maqtaýǵa laıyq. Tek jas pedagogti qoldap, demep jiberetin tetikter tabylmaı tur. Aldaǵy ýaqytta Ertis boıynda jas qusbegiler mektebi qalyptasyp, úlken shahardyń balalary da mıras ónerdi úırene bastasa deımiz.
Pavlodar oblysy