Ulytaý oblysy, Jańaarqa aýdanynyń Mádenı-saýyq ortalyǵynda QR halyq ártisi, Memlekettik syılyqtyń ıegeri, Qazaqstannyń Eńbek Eri Qaırat Baıbosynovtyń 75 jyldyq mereıtoıyna arnalǵan «Qazaqtyń Qaıraty» atty saltanatty kesh ótti, dep jazady Egemen.kz.
Qazaqtyń ulttyq ónerine ólsheýsiz sińirgen eńbegi úshin Memleket basshysy Qasym-Jomart Toqaevtyń qolynan «Qazaqstannyń Eńbek Eri» ataǵyn alǵan ánshi azamatyn Jańaarqa jurty qushaq jaıyp qarsy aldy. Jańaarqadan «Bala Birjan» degen ataqpen attanyp, alpys jylǵa jýyq Arqa ánderin ǵana emes, qazaqtyń halyq ánderin, qazaq kompozıtorlarynyń ánderin halyqqa nasıhattap, ulttyq án ónerinde tuńǵysh «Qazaqstannyń Eńbek Eri» ataǵyn ıelengen dara tulǵa týǵan jeriniń tórinen oryn aldy.
Qazaqtyń kórnekti aqyny, Qazaqstannyń Memlekettik syılyǵynyń laýreaty Ǵalym Jaılybaı, QR Parlamenti Májilisiniń depýtaty, Qazaqstannyń eńbek sińirgen qaıratkeri Amanjol Áltaı, Qazaqstannyń eńbek sińirgen qyzmetkeri, Qazaq KSR jáne Qazaqstannyń densaýlyq saqtaý salasynyń úzdigi Ábilhákim Aqmyrzın, Ulytaý oblysy ákiminiń orynbasary Ulantaı Úsenov, Jezqazǵan qalasynyń ákimi Qaırat Shaıjanov, QR Qurmetti sport qyzmetkeri, mesenat Qanat Ahmetov sııaqty el aldynda júrgen azamattar izgi nıetin jetkizdi.
Qaırat Áýkenuly qazaqtyń ánin álemge pash etken kúmis kómeı ánshi ǵana emes, qazaq dástúrli án ónerin keńinen nasıhattaýshy, zertteýshi, ustaz. Án ónerinde kóptegen ánniń aıtylýyn, óziniń bastapqy maqamyn ózgertpeı jańa turǵyda aıtý úshin ter tókken. Ustazyn alqalap, qoldap, qolpashtaǵan Ǵalym Muhamedın, Serik Ospanov, Erkin Shúkiman, Aıgúl Qosanova, Ardaq Isataeva, Jaqsylyq Kemalov, Serjan Musaıynov, Aıtbek Nyǵyzbaev, Erjan Bazarbekov, Syrym Muhamedjanov sııaqty ónerde óz oryndary shákirtteri Arqany ánge bóledi.
Jańaarqa jurtshylyǵynyń ardaqty ánshige degen qurmeti men yqylasy sheksiz! Mereıtoı ıesi Qaırat Baıbosynovqa óneri men halqyna sińirgen eńbeginiń qurmetindeı Jańaarqa aýdany atynan avtokólik kilti tabystady.
Asylyn ardaqtap, baryn baǵalap, alaqanǵa salǵan halyqtyń bazary tarqamasyn!
Ulytaý oblysy