Búgin respýblıka boıynsha «Taza Qazaqstan» ekologııalyq aksııasy ótti, dep jazady Egemen.kz.
Aýqymdy sharaǵa 610 myńnan astam adam qatysyp, jumylǵan eńbek nátıjesinde 90 myńǵa gektarǵa jýyq terrıtorııa tazartyldy. Sondaı-aq, 180 myń jasyl jelek otyrǵyzyldy - aǵash túrleri aýmaq ereksheligine qaraı tańdalǵan - alma, qara moıyl, tal jáne ırga.
«Biz, ormanshylar, jyl saıyn aǵash otyrǵyzamyz, alaıda búgin bul iske myńdaǵan adamnyń qosylǵanyn kórý- erekshe qýanysh.
Mundaı aksııalar azamattardyń tabıǵatqa jaýapkershilikpen qaraýyn qalyptastyryp, elimizdiń orman resýrstaryn bolashaq urpaq úshin saqtaýǵa yqpal etedi», – dep atap ótti Orman sharýashylyǵy jáne janýarlar dúnıesi komıteti tóraǵasynyń orynbasary M. Elemesov.
Atalmysh shara «Taza Qazaqstan» ekologııalyq mádenıetin damytýdyń 2024 – 2029 jyldarǵa arnalǵan Tujyrymdamasy aıasynda uıymdastyryldy. Onyń maqsaty – qoǵamnyń ekologııalyq mádenıetin arttyrý, tabıǵatqa uqypty qaraý ıdeıasyn keńinen nasıhattaý.
Esterińizge sala keteıik, byltyr Tujyrymdama aıasynda ótken sharalarda árbir úshinshi qazaqstandyq boı kórsetti. Bıylǵy jyldyń 9 aıynda uıymdastyrylǵan ekologııalyq aksııalarǵa 5,4 mln astam adam qatysyp, 966 myń gektarǵa jýyq aýmaqtan 729 myń tonnadan astam qoqys shyǵaryldy, el aýmaǵy 2,4 mln túp aǵashpen tolyqty.
Aıta ketý kerek, bıyl aýmaqty tazalaý jumystaryna bir ýaqytta shyqqan adam sany boıynsha alǵash ret el rekordy ornatyldy. Jetistik elimizdiń KINES rekordtar kitabyna engizildi. Dúnıejúzilik tazalyq kúnine oraılastyrylǵan senbilikke 400 myńnan astam qazaqstandyq qatysty.
Sonymen qatar, ekologııalyq mindetti arttyrýǵa baǵyttalǵan birqatar sharalar uıymdastyryldy - máselen, mektep oqýshylary men joǵarǵy oqý oryndary stýdentterine arnalǵan ekologııalyq bilim berý saǵattary, ekokvestter men pikirtalastar, mektepterde qoqystardy bólip jınaýǵa arnalǵan fandomattar men ekobokstardyń ornatylýy, ekologııalyq bastamalardy, turaqty tutyný jáne óndiris tájirıbesin engizetin kompanııalar men azamattardy kótermeleý t.s.s.
«Taza Qazaqstan» tazalyq, tabıǵatqa qamqorlyq jáne eldiń ekologııalyq bolashaǵy úshin jeke jaýapkershilik ıdeıasy tóńireginde azamattardy biriktirýdiń sımvolyna aınaldy.