Qarjy monıtorıngi agenttiginiń Aqmola oblysy boıynsha departamenti «S-Group» qarjy pıramıdasyna qatysty tergeý jumystaryn aıaqtady. Qarjy pıramıdasynyń aımaqtyq bólimshesin basqarǵandar Kókshetaý qalasynda 59 azamattyń 136 mıllıon teńgesin zańsyz jolmen ıemdengen, dep jazady Egemen.kz.
Olar salymshylarǵa jańadan qosylǵan azamat qarjysynan 5 paıyzyn berýdi ýáde ete otyryp, «S-Pharmaceutical» jáne ózge de jobalarǵa medısınalyq kannabıs óndirisi men dıstrıbýsııasyna ınvestısııa tartý syltaýymen aldap soqqan.
Tergeý barysynda qarjy pıramıdasyna qatysýshylar saıt arqyly tirkelip, bastapqyda keminde 100 AQSh dollaryna salym jasaý kerek bolǵan.
«Kúdiktilerdiń biri buǵan deıin «Life Is Good» jáne «Finiko» qarjy pıramıdalaryna qatysyp, sol jerden tabys taýyp, keıin uqsas shema arqyly óz jobasyn qurǵan. Aıyptalýshylar salymshylardyń aqshasyna elordadan eki páter men avtoturaq ornyn satyp alǵan», delingen QMA habarlamasynda.
Sot olardyń múlkin paıdalanýǵa tyıym salyp, úsh uıymdastyrýshyǵa bultartpaý sharasy qoldanylǵan.