Osy aıdyń 15–17 kúnderi aralyǵynda Almaty qalasynda ınklıýzıvti bilim berý salasyndaǵy eń iri halyqaralyq is-shara – World Inclusion Congress (WIC 2025) Dúnıejúzilik kongresi ótedi, dep habarlaıdy Egemen.kz.
2021 jyly «Inklıýzıvti bilim berý máseleleri boıynsha QR-nyń keıbir zańnamalyq aktilerine ózgerister men tolyqtyrýlar engizý týraly» Zańynyń qabyldanýymen erekshe bilim berý qajettilikteri bar balalar úshin bilim berýdiń barlyq deńgeıinde arnaıy jaǵdaı jasala bastady.
Kongress QR-nyń Oqý-aǵartý mınıstrligi men Almaty qalasy ákimdiginiń qoldaýymen ótkiziledi. Is-sharanyń bastamashylary – Ulybrıtanııadaǵy International Forums of Inclusion Practitioners (IFIP) jáne Qazaqstandaǵy «HOPE» (Help Others Pursue Education) qory.
Kongress aıasynda dóńgelek ústel, plenarlyq sessııalar t.b. uıymdastyrylady.
Is-shara barysynda ınklıýzıvti bilim berýdiń ári qaraı damýyna baǵyt beretin mańyzdy halyqaralyq qujat – Almaty deklarasııasynyń jobasy talqylanady.
Oqý-aǵartý mınıstrliginiń málimetinshe, kongresste is júzindegi tájirıbege, úshjaqty tásilge (pedagogıkalyq ınnovasııalar, tehnologııalyq jetistikter jáne korporatıvtik seriktestik), sondaı-aq jasandy ıntellekt pen jańa tehnologııalardy engizýge erekshe nazar aýdarylady.
Oǵan 40 elden 1200-den astam delegat qatysady dep kútilip otyr. Olardyń qatarynda mınıstrler, sarapshylar, halyqaralyq uıymdar men jetekshi ýnıversıtetterdiń, zertteý ortalyqtarynyń jáne EdTech kompanııalardyń ókilderi bar. Álemdik korporatıvtik kóshbasshylardyń qatysýy strategııalyq múmkindikterge jol ashyp, Qazaqstanǵa álemniń nazaryn aýdaryp qana qoımaı, ınvestısııalar tartýǵa jol ashady.