2023 jyly Astanada em alǵan sheteldik pasıentter sany 2022 jylmen salystyrǵanda tórt ese, al 2024 jyly taǵy eki ese artqan, dep jazady Egemen.kz.
Bul týraly búgin Astanada densaýlyq saqtaý, turaqty damý jáne medısınalyq týrızm máselelerine arnalǵan forýmda aıtyldy. Is-sharaǵa memlekettik organdar, halyqaralyq uıymdar, medısınalyq ortalyqtar, bilim berý mekemeleri, úkimettik emes uıymdar jáne 30-ǵa jýyq elshiliktiń ókilderi qatysty.
«Qazaqstan medısınalyq jáne saýyqtyrý týrızminiń óńirlik ortalyǵyna aınalýǵa bar jaǵdaı jasalǵan. Ol úshin sheteldik pasıentterge qyzmet kórsetýdiń biryńǵaı standarttaryn engizý, klınıkalar men týroperatorlar arasyndaǵy baılanysty kúsheıtý jáne elimizdi emdelý men ońaltýdaǵy senimdi baǵyt retinde tanytý qajet», dedi Týrızm jáne sport mınıstri Erbol Myrzabosynov.
Qazaqstanǵa jıi em izdep keletin elder arasynda Qytaı, Úndistan jáne Túrkııa azamattary bar. Shara barysynda medısınalyq týrızmdi damytý jáne salalar arasyndaǵy yntymaqtastyqty arttyrý maqsatynda Týrızm jáne sport mınıstrligi men Densaýlyq saqtaý mınıstrligi arasynda ózara yntymaqtastyq týraly memorandýmǵa qol qoıyldy.
Jıynǵa qatysýshylar «Qazaqstannyń salamatty qalalary» jelisin qurý bastamasyna erekshe nazar aýdardy.
Forým sońynda Týrızm jáne sport mınıstri Erbol Myrzabosynov pen Densaýlyq saqtaý mınıstri Aqmaral Álnazarova otandyq medısınanyń ınnovasııalyq jetistikteri men tehnologııalary usynylǵan iri medısınalyq ortalyqtar men uıymdardyń kórmesin tamashalady.