Densaýlyq saqtaý mınıstrligi medısınalyq týrızmniń negizgi baǵyttarynyń biri retinde sanatorlyq-kýrorttyq aımaqtardy damytýǵa baǵyttalǵan keshendi sharalardy júzege asyrýda, dep jazady Egemen.kz.
Medısınalyq týrızmdi damytý aıasynda jyl boıy emdik-saýyqtyrý qyzmetteriniń usynysyn keńeıtý maqsatynda medısınalyq uıymdar, sanatorııler men týroperatorlar arasynda yntymaqtastyqty nyǵaıtý kózdelgen.
Búginde Qazaqstannyń sanatorlyq-kýrorttyq uıymdaryna jyl saıyn shamamen jarty mıllıon adam keledi. Aldaǵy jyldary bul kórsetkishti ınfraqurylymdy jetildirý, «Kazakhstan Health Travel» brendin ilgeriletý jáne sheteldik pasıentterdi tartý arqyly arttyrý josparlanýda.
«Bizdiń tabıǵı baılyqtarymyz — el ıgiligi ǵana emes, halyq densaýlyǵyn nyǵaıtýdyń jáne medısınalyq týrızmdi damytýdyń strategııalyq quraly. Qazaqstan Ortalyq Azııadaǵy sanatorıılik-kýrorttyq emdeýdiń ortalyǵyna aınalýǵa tolyq áleýetke ıe», — dedi Densaýlyq saqtaý mınıstri Aqmaral Álnazarova búgin Astanada ótken «Qazaqstan Respýblıkasyndaǵy medısınalyq týrızmdi damytý: bolashaǵy men múmkindikteri» atty alǵashqy halyqaralyq konferensııada sóılegen sózinde.
Forým barysynda atap ótkendeı, elimizdiń strategııalyq artyqshylyǵy — qaıtalanbas tabıǵı-klımattyq áleýetinde. Taýly aımaqtyń taza aýasy, emdik kólder, mıneraldy jáne termaldy sýlardyń biregeı úılesimi sheteldik pasıentter men medısınalyq týrısterdiń erekshe qyzyǵýshylyǵyn týdyrady.
Osy tabıǵı faktorlar qalpyna keltirý medısınasy, ońaltý jáne aýrýlardyń aldyn alý salalaryn biriktiretin mańyzdy negizge aınalýda.