tuǵyry bólek tulǵaǵa, ult úshin týǵan jampozǵa eskertkish-músin ornatylyp, murajaı ashyldy
«Ár ýaqytta meniń júregimniń tórinen oryn alatyn meniń er inim – Jumabek». Dýaly aýyz Ǵabıt Músirepov N. Hrýshevtiń quryq boılamaıtyn zymııandyq saıasaty saldarynan qazaqtyń ulan-baıtaq jeri bólshektenip kete jazdaǵan tusta arystandaı aıbat, jolbarystaı qaırat kórsetip, el tutastyǵynyń saqtalyp qalýyna sebepker bolǵan ultjandy azamattyń erligin osylaı baǵalaǵan eken. Ol kezderi bodandyq qamytyn kıip, otarlaýdyń teperishin ábden tartqan qazaq halqynyń janaıqaıyn Máskeýdegi bılikke ashyq aıtý múmkin emes-tuǵyn. Basyna qara bult úıiriletinin, qyzmetten shettetiletinin, qýǵyndaýǵa túsetinin bile tura ekiniń biri táýekel ete bermeıtin qadamǵa barýyn kózsiz erlikten góri ata-babamyz qasyq qanymen qorǵap, keıinge amanattap ketken atamekenge degen zor súıispenshiliktiń eren úlgisi dep túsingen durys bolar.
Soltústikqazaqstandyqtar úshin de Jumabek Táshenovtiń orny bólek. Sanaly ǵumyrynyń bes jylyn Qyzyljar óńirinde (1947-1952 jyldary-oblatkom tóraǵasynyń orynbasary, tóraǵasy) ótkizgen onyń ekonomıkany, mádenıetti, rýhanııatty damytýǵa qosqan úlesi ólsheýsiz. Demek, nar tulǵaly azamatty qalaı ulyqtasaq ta jarasady. Kópten beri esimi eleýsiz bolyp kelgen memleket jáne qoǵam qaıratkeriniń 100 jyldyq mereıtoıy qarsańynda Petropavl qalasyndaǵy № 20 mektepke atyn berý týraly kópshiliktiń usynystary Úkimet tarapynana qoldaý tapty. Endi, mine, ulttyq tálim-tárbıe beretin oqý ordasy aldyna eskertkish-músin ornatylyp, marqumnyń týǵan-týystarynyń, zııaly qaýym ókilderiniń, jastardyń, oqýshylardyń qatysýymen ótken saltanatty shara ereksheligimen este qaldy.
Oblys ákimi Erik Sultanov jınalǵandardy aıtýly oqıǵamen quttyqtap, taǵylymdy da tálimdi isteri halyq jadynda óshpesteı saqtalyp qalǵan tulǵa jaıly tolǵana sóıledi. Marqumnyń uly Saıan Jumabekuly áke jaıly jyly esteliktermen, ár jyldary qyzmet atqarǵan Soltústik Qazaqstan oblysynyń qurmetti azamaty Jaqsylyq Ysqaqov, Grıgorıı Kýhar, taǵy basqalary jarqyn beınesi jaıly áserlerimen bólisti.
Eskertkish-músinniń avtory, V. Sýrıkov atyndaǵy Máskeý memlekettik akademııalyq kórkemsýret ınstıtýtynyń túlegi, búginde T.Júrgenov atyndaǵy Qazaq ulttyq óner akademııasynyń kafedra meńgerýshisi qyzmetin atqaratyn Málik Júnisbaevtyń esimi de qyzyljarlyqtarǵa jaqsy tanys. Kezinde Úkili Ybyraıdyń músinin tamasha somdaǵan sheberge tańdaýdyń túsýi beker emes. Onyń ózine júktelgen mindetti úlken jaýapkershilikpen atqaryp shyqqany birden ańǵarylady. Parasatty kelbet, qaısar rýh músinde keremet kelisim tapqan.
Aıtýly sharaǵa mektep basshylyǵy, muǵalimder men oqýshylar erekshe yjdahattylyqpen daıyndalypty. «Qaısar rýhty azamat» dep atalatyn stendte mol maǵlumattar toptastyrylypty. Mártebeli qonaqtar murajaıdyń tusaýkeserine qatysyp, qaıratkerdiń jeke zattarymen, eńbek, ómir joldarynan syr shertetin shyǵarmalarmen, esteliktermen tanysty.
– Mektepte 2010 jyldan beri «Izdeý» toby jumys isteıdi. Onyń músheleriniń tynymsyz izdenisteri arqasynda kóptegen tyń derekter jınaldy. Kórshi oblystardan qoljazbalar, jádigerler alyndy. Shymkent qalasyna deıin baryp qaıttyq,–dedi sóıleskenimizde tarıh pániniń muǵalimi Klara Moldahmetova.
Akt zalynda jas órender uıymdastyrǵan ádebı-kompozısııalyq keshke J.Táshenovtiń kelini Fatıma Sadyqqyzy rızashylyǵyn bildirip, alǵysyn jaýdyrdy.
О́mir ESQALI,
«Egemen Qazaqstan».
Soltústik Qazaqstan oblysy.
Sýretti túsirgen
Amangeldi BEKMURATOV.