Janarmaı qory jetkilikti me?

«Atyraý munaı óńdeý za­ýyty» JShS baspasóz qyzme­tiniń máli­metine súıensek, osy kezeń­de zaýyt­taǵy qysymmen jumys isteıtin 1 174 ydys pen apparatqa, 46 peshke, tehnologııalyq 1 458 qu­byr jelisine mindetti tehnıkalyq kýálan­dyrýlar men saraptamalar júrgizý kózdelgen. Sondaı-aq túrli qondyrǵyda 316 tonnadan astam katalızator aýystyrylady. Eń kúrdeli ári negizgi operasııa – baıaý koksteý qondyrǵysynyń reaktorlaryndaǵy konýsty túpterdi aýystyrý. Bul úshin zaýyt aýmaǵynda júk kótergishtigi 750 tonnalyq 2 biregeı kran ornatylǵan. Reaktorlarda jabdyq senimdiligin arttyrý úshin ınnovasııalyq boljam­dy dıagnostıka júıesi iske qosylady.

«Bul jabdyqtardyń senimdiligin, tehnologııalyq úderisterdiń turaq­tylyǵyn qamtamasyz etýge, óndi­ristiń tıimdiligin arttyrýǵa baǵyt­talyp otyr. Josparlanǵan aldyn alý jumysyn 1 880 maman atqarady. Jumysty sapaly atqarý úshin 62 ar­naıy tehnıka tartylady. Osy kezeń­de zaýyt jabdyqtaryna mindet­ti tehnıkalyq kýálandyrý men saraptamalar júrgiziledi. Jóndeý kezinde eńbekti qorǵaý, ónerkásip jáne órt qaýipsizdigine erekshe kóńil bólinedi», dep habarlady kásip­orynnyń baspasóz qyzmeti.

Osy kezeńde munaı ónimderin jóneltýdi toqtatpaý úshin Energetıka mınıstrligimen kelisilgen kestege sáıkes otyn qory jınaqtalyp­ty. Qazir zaýyttyń rezervýarlyq parkinde 37 myń tonna janarmaı, 30 myń tonna dızel otyny, 6,8 myń tonna avıaotyn bar. Bul qor elimizdiń batys óńirlerine munaı ónimderiniń bir­kelki ári ýaqtyly jóneltýin qam­ta­­masyz etedi.

Zaýytta jyl basynan bergi 8 aıda jeńil munaı ónimderi óndirisiniń úlesi 77,5%-dy qurady. Al óńdeý tereńdigi – 88,6%. Dızel otynynyń (+15%) jáne avıaotynnyń (+13%) óndiris jospary artyǵymen oryndalypty. Nátıjesinde, kásiporyn bıýdjetke 129 mlrd teńge aýdaryp, jos­parly kórsetkishten 24 mlrd teńgege artyq túsim jiberdi.

Zaýyttyń jyldyq munaı óńdeý kólemin 6,1 mln tonnaǵa deıin arttyrý josparlanǵan. Al jóndeýaralyq kezeńdi 36 aıǵa deıin uzartý kózdelip otyr.

Atyraý oblysy