О́ńirdiń eldi mekenderinde «Taza Qazaqstan» baǵdarlamasy aıasyndaǵy ekologııalyq aksııa ótti. Arqalyq qalasynyń turǵyndary jergilikti pedagogıka ýnıversıtetiniń jańadan jańǵyrtylǵan úshinshi oqý ǵımaratynyń aldyna, Ahmet Baıtursynuly alleıasyna 500-den asa qaraǵaı, qaıyń kóshetin otyrǵyzdy.
Kúzgi aǵash otyrǵyzý jumysyna memlekettik qyzmetshiler, stýdentter, eriktiler, belsendi jastar, qala turǵyndary atsalysty. Is-sharaǵa oblys ákimi Qumar Aqsaqalov arnaıy kelip qatysyp, qala turǵyndarymen júzdesip, kóppen birge kóshet otyrǵyzdy.
«Baǵdarlama aıasynda Arqalyq qalasynda aýqymdy jumys atqarylyp jatyr. Qalada bos turǵan ǵımarattar qalpyna keltirilip, jańa áleýmettik nysandar, turǵyn úıler paıdalanýǵa berildi. Sonymen qatar kóppáterli 71 turǵyn úıdiń qasbeti men tóbesine jóndeý júrgizilip, 21 myń sharshy metr aýmaqqa tósemtas tóseldi. Bos turǵan 46 eski ǵımarat buzylyp, ysyrylyp, qalanyń ajary kirip qaldy. Arqalyq pen qalaǵa qarasty eldi mekenderden 95 myń tonnadan astam qoqys shyǵaryldy. Bul – turǵyndar men bıliktiń birlesken eńbeginiń nátıjesi. Osynyń bári Arqalyqty kórkeıtip, taza ári zamanaýı qalaǵa aınaldyrý maqsatynda jasalyp jatyr. Bul baǵyttaǵy jumystar ári qaraı jalǵasady», dedi Q.Aqsaqalov.
Ekologııalyq aksııaǵa Arqalyq jurtshylyǵyna jaqsy tanymal ustazdar áýleti – Qoldasbaevtar otbasy da belsendi atsalysyp, óz áýletteriniń atynan ataýly aǵash kóshetin otyrǵyzdy.
«Kópshilik is-sharaǵa ulymdy, kelinimdi, nemerelerimdi ádeıi ertip keldim. Ákem ómir boıy bala oqytyp, ustazdyq etti. О́zim Ybyraı Altynsarın atyndaǵy Arqalyq pedagogıkalyq ýnıversıtetiniń dosentimin, ardager ustazbyn. Nemerem Erlan da ustazdyq jolyn tańdady. Búgin – bárimiz úshin qýanyshty kún. О́ıtkeni tazalyq aksııasy eń aldymen ózimizge kerek, halqymyzdyń ekologııalyq mádenıetin qalyptastyratyn izgilikke bastaıtyn máni tereń, mańyzy zor is-shara. Qoldasbaevtar áýletiniń atynan úsh túp qaraǵaı kóshetin otyrǵyzdyq. Endi balalarmen aqyldasyp, osy kóshetterdi qur otyrǵyzyp, tastap ketpeı, ári qaraıǵy kútimin óz moınymyzǵa alaıyq dep otyrmyz. Ábden tamyr jaıyp, boılap óskenshe osy jerge jıi kelip turamyz. Sýaryp, baptaımyz. Memleket basshysy Torǵaı óńiri Úkimettiń aıryqsha nazarynda bolatynyn aıtty. Osynyń bári Arqalyqtyń, jalpy Torǵaıdyń keleshegi jarqyn ekenin kórsetedi. Búginde halyqtyń jaǵdaıy jaqsaryp, qalamyz jyldan-jylǵa jańaryp, gúldenip, kórkeıip kele jatyr», deıdi ardager ustaz Zına Qoldasbaeva.
Tazalyq aksııasyna, ásirese, jergilikti 4 kolledj ben Arqalyq pedagogıka ýnıversıtetiniń oqytýshylary men stýdentteri belsene atsalysty. Polıtehnıkalyq kolledjdiń stýdentteri Ahmet Baıtursynuly saıabaǵyna 200-ge jýyq aǵash kóshetin otyrǵyzdy.
«Taza Qazaqstan» jalpyulttyq ekologııalyq aksııasy búginde qalypty ómir saltyna, dástúrge aınaldy. Aksııa bastalǵaly qalamyzdy kórkeıtýge, ózimiz ómir súrip jatqan ortany, aınalamyzdy taza ustaýǵa baǵyttalǵan senbilikter, búgingideı aǵash otyrǵyzý jumystary jıi ótip turady. Jalpy, Arqalyq jastary Prezıdent bastamasyn qashanda qoldaıdy. «Taza Qazaqstan» baǵdarlamasy eldi mekenderdiń sanıtarlyq jaǵdaıyn jaqsartýdan bastap, jasyl aımaqtardy qalpyna keltirýge, ınfraqurylymdy jańǵyrtýǵa deıingi keń aýqymdy mindetterdi qamtıdy. Bizdiń Torǵaı óńirine de erekshe nazar aýdarylyp jatyr», deıdi qalalyq jastar resýrstyq ortalyǵynyń basshysy Danııar Qojahmetov.
Jalpy, «Taza Qazaqstan» baǵdarlamasy aıasynda Qostanaı oblysynda 22 myńǵa jýyq aǵash kósheti otyrǵyzylǵan.
Qostanaı oblysy,
Arqalyq qalasy