Aýyl sharýashylyǵy mınıstri Aıdarbek Saparov Abaı oblysyna jumys sapary aıasynda Semeı qalasynda jergilikti aýyl sharýashylyǵy taýar óndirýshilerimen kezdesti. Jıynǵa oblys ákimi Berik Ýálı, óńirdegi sharýashylyq jetekshileri, kásiporyn basshylary qatysty.
Abaı oblysy – aýyl sharýashylyǵyn damytýda zor áleýetke ıe óńir. Aımaqta 11 myńǵa jýyq agroqurylym jumys isteıdi. Bıyl qańtar-tamyz aralyǵynda aýyl sharýashylyǵy óniminiń jalpy kólemi 221 mlrd teńgege jetip, respýblıka boıynsha 4-oryndy ıelendi. Naqty kólem ındeksi 102,9%-dy qurady. Jalpy jınalatyn egis kólemi 782,1 myń gektar bolsa, onyń 80%-y orylyp, 265,2 myń tonna astyq bastyryldy. Sonymen qatar 96,6 myń tonna kartop pen 101,6 myń tonna kókónis jınaldy.
«Prezıdent bıylǵy Joldaýynda ınvestısııa tartýdyń mańyzdylyǵyn atap ótti. Osy turǵyda jyl basynan aýyl sharýashylyǵynyń negizgi kapıtalyna 32 mlrd teńge ınvestısııa tartyldy, bul ótken jyldyń sáıkes kezeńimen salystyrǵanda 170%-ǵa joǵary. Osy baǵytta 2030 jylǵa deıin oblysymyzda ázirlengen óńirlik ınvestısııalyq jobalarynyń kartasyna sáıkes 197,5 mlrd teńge kóleminde 85 iri agrojoba iske asyrylady. Kezdesýimizdiń negizgi maqsaty – aýyl sharýashylyǵy salasyndaǵy memlekettik saıasattyń negizgi baǵyttaryn túsindirý ǵana emes, sonymen qatar sizderdi tolǵandyryp júrgen naqty máselelerdi birge qarastyrý, ashyq dıalog ornatý», dedi oblys ákimi.
Kezdesý barysynda aýyl sharýashylyǵy salasyn ártaraptandyrý, ınvestısııa tartý, óńdeý kásiporyndaryn damytý jáne et kombınaty qurylysynyń barysy sııaqty ózekti máseleler talqylandy.
«Abaı oblysy – jańadan qurylǵan óńir. Aýyl sharýashylyq áleýeti zor aımaq. Oblysta iri et kombınaty salynaıyn dep jatyr. Ol úshin mal sharýashylyǵyn joǵary deńgeıde damytýymyz kerek. Mınıstrlik tarapynan tıisti kómek jasalady», dedi A.Saparov.
Abaı oblysy