Qazaqstanda quqyq buzýshylyqtardyń jekelegen túrlerin boldyrmaý maqsatynda jańa profılaktıkalyq júıe engizilmek. Zań jobasynda turmystyq zorlyq-zombylyqtyń aldyn alý, balalardyń qaraýsyz jáne panasyz qalýyna jol bermeý, qoǵamdyq oryndardaǵy mas kúıinde jasalatyn jáne qaıtalanatyn quqyq buzýshylyqtarǵa qarsy sharalar qamtylǵan, dep habarlaıdy Egemen.kz.
Jańa tásil quqyq buzýshylyqtardyń naqty sanattaryna jedel áreket etýge jáne olardyń sebepterin joıýǵa baǵyttalady. Sondaı-aq, profılaktıkalyq júıege vıktımologııalyq tetikter engizilip, yqtımal qurbandardyń sanyn azaıtýǵa basymdyq beriledi. Bul sharalar qaýipti aımaqtarda baqylaýdy kúsheıtýdi, azamattardy qaqtyǵystardy beıbit jolmen sheshýge jáne ózin-ózi qorǵaýǵa úıretýdi, sondaı-aq zorlyq-zombylyq qurbandaryn anyqtap, olarǵa kómek kórsetýdi qamtıdy.
Sonymen qatar, zań jobasynda «qoǵamdyq oryn» uǵymy naqty anyqtalyp, profılaktıkalyq sharalardy qoldanýdyń biryńǵaı quqyqtyq negizi jasalǵan.
«Ákimshilik quqyq buzýshylyq týraly kodekste engizilgen ózgerister zańsyz kontentti ornalastyrǵany jáne taratqany úshin, sondaı-aq quqyq buzýshylyqqa yqpal etetin sebepter men jaǵdaılardy joıý týraly memlekettik buıryqtardy qasaqana oryndamaǵany úshin jaýapkershilik belgilengen. Bul rette quqyqtyq birizdilikti qamtamasyz etý úshin Áleýmettik kodekske jáne úsh zańǵa ózgerister men tolyqtyrýlar engiziledi», dep habarlady Májilistiń baspasóz qyzmeti.