Qonaev qalasynda meıirim men izgilikke toly erekshe mereke – Múgedektigi bar adamdar kúni atalyp ótti. Sharaǵa erekshe balalar men olardyń ata-analary, áleýmettik sala mamandary jáne qoǵamdyq uıym ókilderi qatysty, dep jazady Egemen.kz.
Is-sharany qala ákimi Ashat Berdihanov ashyp, qatysýshylardy merekemen quttyqtady. Ol memleket tarapynan múgedektigi bar azamattardyń ómir sapasyn jaqsartýǵa jáne áleýmettik qoldaý sharalaryn kúsheıtýge aıryqsha kóńil bólinip otyrǵanyn atap ótti.
«Búginde Qonaev qalasynda 1416 múgedektigi bar azamat, onyń ishinde 325 erekshe bala bar. «Jeke ońaltý baǵdarlamasy» aıasynda 240 adam sanatorıılik joldamamen, 46 azamat arba jáne tıflo-sýrdo quraldarymen qamtamasyz etildi», – dedi ol.
Budan bólek, shahar basshysy úıde bilim alatyn balalardyń otbasylaryna 31 456 teńge kóleminde járdemaqy tólenip jatqanyn aıtty.
«Bıyl úsh erekshe balasy bar otbasy óz kásibin bastaýǵa grant aldy. Bul – memleketimizdiń áleýmettik ádildik pen teń múmkindikter qaǵıdatyna degen berik ustanymynyń aıǵaǵy», – dedi qala ákimi.
Sondaı-aq Ashat Berdihanov erekshe jandardy qoǵam ómirine beıimdeýge úles qosyp júrgen azamattarǵa alǵysyn bildirdi.
Marapat ıeleri qatarynda «Qapshaǵaı Samǵa» qoǵamdyq birlestiginiń jetekshisi Marat Bekenuly, «Qamqor júrek» birlestiginiń basshysy Lázzat Imanǵalıqyzy, sondaı-aq «Meıirim Qonaev-2025», «Altyn bala», «Erekshe balalar ata-analarynyń odaǵy», «Kúndizgi bolý ortalyǵy» uıymdarynyń jetekshileri bar. О́nerpaz balalar da nazardan tys qalmaı, olarǵa Alǵys hat tabystaldy.
Merekelik kesh konserttik baǵdarlamaǵa ulasyp, erekshe balalar men olardyń ustazdary án shyrqap, bı bıledi. Balalarǵa qýanysh syılaý maqsatynda anımatorlar men túrli oıyndar uıymdastyryldy, al «KazSMU» qurylys kompanııasy búldirshinderge syılyqtar tartý etti.
Almaty oblysy.