Jambyl atyndaǵy Qazaq memlekettik akademııalyq fılarmonııasynda dańqty kompozıtor Nurǵısa Tilendıevtiń 100 jyldyq mereıtoıyna arnalǵan respýblıkalyq dırıjerler baıqaýy ótti. Saýsaǵynan sıqyrly saz tógilgen mýzyka sheberlerin bir alańda toǵystyrǵan óner dodasy eki kúnge jalǵasty.
Mádenıet jáne aqparat mınıstrliginiń qoldaýymen ótken shyǵarmashylyq báıgede 18 ben 35 jas aralyǵyndaǵy ónerpazdar baq synap, el óńirlerinen kelgen 23 úmitker ózara myqtyny anyqtady. Qazylar sheshimimen olardyń arasynan segiz fınalıst ekinshi kezeńge oıysty. Júldege laıyq dep tanylǵan dırıjerler qorytyndy gala-konsertte marapattaldy.
Baıqaý barysynda erekshe oqıǵaǵa kýáger boldyq. Kásibı dırıjerler Mádı О́mirzaqov pen Qýanysh Ismaılov qazylar tarapynan joǵary upaı alǵanyna qaramastan, ini-qaryndastaryna jol berdi. Olardyń bul sheshimin naǵyz óner adamyna tán degdarlyq dep baǵalaǵan «Astana Opera» memlekettik opera jáne balet teatrynyń dırıjeri Abzal Mýhıtdınov pen Qyzylorda oblystyq sımfonııalyq orkestriniń kórkemdik jetekshisi jáne bas dırıjeri Músilim Ámze qos dırıjerge Astana qalasy ákimdiginiń E.Rahmadıev atyndaǵy memlekettik akademııalyq fılarmonııasynyń Sımfonııalyq jáne Qazaq orkestrlerimen birlesip jeke konsert ótkizýge arnaıy joldama usyndy.
Baıqaý qorytyndysyna sáıkes, Arshat Shárip pen Dáýrenbek Súıindik úzdik ónerleri úshin arnaıy dıplomdarmen jáne qarjylaı sertıfıkattarmen marapattalsa, astanalyq Dına Ardaq «N.Tilendıevtiń shyǵarmalaryn úzdik oryndaǵany úshin» atalymyn jeńip aldy. О́ner dodasynda Qabyl Arnat, Dáýlet Ǵabıtov jáne Abaı Raqyshev III oryn ıelense, Álı Saparbek II oryndy enshiledi. Baıqaýdyń eń basty júldesi Nurǵalı Áshimhanǵa buıyryp, oǵan I oryn dıplomy men bir mıllıon teńgelik sertıfıkatty Mádenıet jáne aqparat vıse-mınıstri Aıbek Sydyqov tabystady. Baıqaýǵa qatysqan barlyq úmitker Mádenıet jáne aqparat mınıstri Aıda Balaevanyń Alǵyshatymen marapattaldy.
Orkestrdiń kórkemdik jetekshisi ári bas dırıjeri, qazylar alqasynyń tóraǵasy Dinzýhra Tilendıeva baıqaý tek jas dırıjerler saıysy ǵana emes, uly kompozıtor murasyn tereń zerdelep, jas býynǵa jetkizýdiń erekshe múmkindigi ekenin atap ótti.
ALMATY