Keıingi eki jyl bederinde Jambyl óńirinde «Taza Qazaqstan» ekologııalyq aksııasy aıasynda aýqymdy jumys atqarylyp jatyr. Elimizdegi jasyl qalalardyń sanatyna jatatyn Taraz shaharynda da tóńirekti tegis taza ustaý maqsatynda birshama is tyndyryldy. Eń bastysy, shahar halqy ekologııalyq mádenıetke basa nazar aýdara bastaǵany kóńil qýantady.
Oblys ákimi Erbol Qarashókeev bastap, Taraz qalasynyń ákimi Baqytjan Orynbekov qoshtap, oblys ortalyǵyn kórkeıtý, qorshaǵan ortany qorǵaý baǵytynda oblys ortalyǵynda turaqty túrde senbilikter, túrli aksııa uıymdastyrylyp otyrady. Budan bólek, Taraz qalasynda jasyl jelekti túgendeý, sıfrlandyrý jumysy qarqyndy túrde júrgizilip jatyr. Resmı derekke júginsek, aldaǵy kúnderi arnaıy saıt iske qosylady. Munda oblys ortalyǵyndaǵy derekqordyń biryńǵaı júıesi qalyptastyrylady.
Jergilikti atqarýshy bılik ókilderi Taraz qalasynda jańadan qurylǵan eki aýdandy kórkeıtý jumysyna aıryqsha nazar aýdaryp otyr. Osy oraıda «Jibek joly» aýdanyna qarasty «Qyzylabad» turǵyn alabynda arnaıy senbilik uıymdastyrylyp, alǵashqy kezeńde 10 myń túp qaraǵash kósheti egildi.
Jańa aýdannyń kelbetin qalyptastyrýǵa den qoıǵan jurt eldik iske jumylǵan judyryqtaı uıymshyldyqpen kiristi. Is-sharaǵa atsalysqandardyń qatarynda memlekettik mekemeniń qyzmetkerleri, jastar, eriktiler bar. Jalpy sany úsh myńǵa jýyq adam qatysyp, belsendilik kórsetti. Ekologııalyq aksııaǵa óńir basshysy Erbol Qarashókeev pen Taraz qalasynyń ákimi Baqytjan Orynbekov te qatysty.
Ekologııalyq aksııa Taraz qalasynyń ózge de shaǵyn aýdandarynda uıymdastyryldy. Atap aıtsaq, qala aýmaǵynda jarııalanǵan sanıtarlyq-tazalyqtyń eki aılyǵy aıasynda «Jansaıa» shaǵyn aýdanynda jalpyqalalyq senbilik ótti. Senbilikke 250-ge jýyq adam, 7 arnaıy tehnıka jumyldyrylyp, nátıjesinde 70 tekshe metrge jýyq qoqys syrtqa shyǵaryldy. Qaladaǵy ózge de ýchaskelerde tazalyq jumystary júıeli túrde atqaryldy.
Jalpy, aksııa aıasynda jyl basynan beri shahar aýmaǵynda senbilikter turaqty túrde uıymdastyrylyp keledi. Is-shara barysynda kásiporyndar men mekemelerge, barlyq bıznes ókilderine tazalyq jumystaryn júrgizetin aýmaqtar bekitilip, 30 myńǵa jýyq adam atsalysty. Nátıjesinde, búginge deıin josparlanǵan 15 shaqyrym aryq júıesi, 230 shaqyrymdaı kóshe, 400 myń sharshy metrge jýyq saıabaq alańdary tazalandy.
Jergilikti atqarýshy bılik ókilderi Taraz qalasynyń abattandyrý jumysyna aıryqsha kóńil bólip otyr. Osy maqsatta kógaldandyrý, jasyl aımaq qurý josparyna sáıkes «Jasyl beldeý» baǵdarlamasy qabyldanǵan. Bul baǵdarlama aıasynda 2023–2024 jyldary jyl saıyn 20 ga jerge 20 myń kósheti otyrǵyzyldy. 2025 jyldyń kóktem aılarynda 10 myń túp aǵash egildi, kúz aılarynda taǵy da 10 myń túp egý josparlanǵan. Buǵan qosa, qalanyń ortalyq kóshelerine, saıabaqtarǵa, basqa da alleıalar men skverlerge 2023 jyly 4,5 myń, 2024 jyly 5 myń túp ártúrli aǵash egilse, bıylǵy jyly jospardaǵy 10 myń aǵashtyń 5 myńy egildi.
О́ńir basshysy Erbol Qarashókeev oblys ortalyǵynda jańadan qurylǵan eki aýdannyń tazalyǵyna, abattandyrý jumysyna aıryqsha nazar aýdaryp otyr. Qalada aýqymdy jumystar atqarylyp jatyr. Áýelden jasyl qala retinde tanylǵan Tarazdy odan ári kórkeıtý isi aldaǵy ýaqytta da jalǵasyn tabady.
«Aýdan aýmaǵyn abattandyrý, sanıtarlyq tazalyq jumysyn júrgizý maqsatynda birshama tirlik tyndyryldy. Kósheler men aýlalarda turmystyq qatty qaldyqtardy shyǵarý, jınaqtaý, tıisti oryndarǵa jetkizý jumystary, kópshilik oryndarda sanıtarlyq tazalyq is-sharalary uıymdastyrylyp, zańsyz tógilgen qurylys qaldyqtary shyǵaryldy. Esepti kezeńde barlyǵy 24 senbilik uıymdastyrylyp, olarǵa 10 myńnan asa adam qatysty, 150-den asa tehnıka tartyldy. Aýdan aýmaǵyna qarasty kósheler men aryq júıeleri, saıabaqtar men qoǵamdyq oryndar tazalandy. Nátıjesinde, 690 tonna kúl-qoqys qala aýmaǵynan tys arnaıy oryndarǵa shyǵaryldy. Sonymen qatar tamyz aıynda «Aqbulaq», «Qarataý», «Jaılaý», «Saltanat», «Qarasý», «Samal» shaǵyn aýdandarynda jalpy qalalyq senbilik uıymdastyryldy. Oǵan barlyq qala ákimdigine qarasty mekemeler qatysyp, aryq-kanaldar tazalanyp, taldardyń túpteri ákteldi», dedi «Áýlıeata» aýdanynyń ákimi Barlyq Tórehanov.
Oblys ortalyǵynda jańadan qurylǵan «Jibek joly» aýdanynda da sanıtarlyq-tazalyq jumysy talapqa saı atqarylyp jatyr. Aýdan basshylary aksııa aıasynda turaqty túrde senbilik uıymdastyrýdy qolǵa alǵan.
«Aýdan aýmaǵyndaǵy aıaldamalar, kósheler boıy, aýlalarda turaqty túrde tazalyq jumysy júrgizilip jatyr. Qyrkúıek aıynyń basynan beri shyǵarylǵan jalpy qoqys kólemi – 710 tonna. Sondaı-aq aýdan aýmaǵyndaǵy kásipkerlik nysandar, memlekettik mekemeler óz aýmaqtarynda tazalyq jumystaryn kúndelikti atqaryp otyrady. Kópqabatty turǵyn úılerdiń turǵyndaryna apta saıynǵy senbilik jónindegi túsindirý jumystaryn der kezinde qolǵa aldyq», deıdi «Jibek joly» aýdany ákiminiń mindetin atqarýshy Nurlan Oljabaev.
Ekologııalyq aksııaǵa tarazdyq oqýshylar da bir kisideı úles qosyp jatyr. Jaqynda Taraz qalasyndaǵy №66 «Keleshek mektebiniń» 7-synyp oqýshysy Injý Dáýlet tyń bastama kóterip, qala kúni merekesine oraı óz qolymen ósirgen 2 900 túp aǵashty tartý etti. Oqýshynyń bul isi kópke úlgi bolatyny anyq.
Taraz