Premer-mınıstr Oljas Bektenov Nashaqorlyqtyń aldyn alý jáne esirtki qylmysyna qarsy is-qımyl boıynsha memlekettik organdardyń qyzmetin úılestirý jónindegi respýblıkalyq shtab otyrysyn ótkizdi.
Otyrysta Ishki ister, Densaýlyq saqtaý, Oqý-aǵartý, Mádenıet jáne aqparat mınıstrleri Memleket basshysynyń bıylǵy tamyz aıynda ótken Qaýipsizdik keńesi otyrysynda bergen nashaqorlyqtyń taralýyna qarsy sharalar qabyldaý jónindegi tapsyrmalaryn júzege asyrý barysy týraly baıandama jasady. Úkimet janyndaǵy Quqyq buzýshylyqtyń aldyn alý jónindegi vedomstvoaralyq komıssııanyń tapsyrmalary aıasynda atqarylyp jatqan sharalarǵa nazar aýdaryldy.
Premer-mınıstr nashaqorlyq pen esirtki qylmysy ulttyq qaýipsizdikke qater tóndiretin jáne júıeli ári vedomstvoaralyq tásildi talap etetin ózekti másele retinde qala beretinin aıtty.
«Memleket basshysy jarııalaǵan «Zań men tártip» qaǵıdatyn qamtamasyz etý – qoǵamnyń ornyqty damýynyń, quqyqtyq tártipti nyǵaıtýdyń, azamattar quqyǵyn qorǵaýdyń mańyzdy sharty. Memlekettik organdar nashaqorlyqtyń aldyn alý men esirtki qylmysyna qarsy is-qımyl boıynsha aýqymdy jumystar júrgizip keledi. Birqatar zań qabyldanyp, salalyq ınstıtýttar men ınfraqurylymdar qurylýda, bul saladaǵy halyqaralyq yntymaqtastyq keńeıe tústi. Atalǵan jumys qarqynyn tómendetýge bolmaıdy, ol jalpyulttyq sıpatqa ıe bolýy kerek», dedi O.Bektenov.
Búginde elimizde 2026–2028 jyldarǵa arnalǵan nashaqorlyq pen esirtki bıznesine qarsy kúrestiń keshendi jospary ázirlenýde, onda jańa strategııa men tásilder qoldanylady. Jastar arasynda, onyń qatarynda NEET sanatyndaǵy oqymaıtyn jáne jumys istemeıtin jastar arasynda, aldyn alýǵa erekshe nazar aýdarylady. Buqaralyq sport pen shyǵarmashylyq sheshimderdiń múmkindikterin belsendi paıdalaný qajet ekenine nazar aýdaryldy.
Ishki ister mınıstri Erjan Sádenov esirtkiniń ınternet-saýdasyna qarsy is-qımyl jónindegi jumystyń jandanǵany týraly baıandady. «Kıbernadzor» júıesiniń kómegimen anyqtalǵan jáne buǵattalǵan saıttar sany 11 esege ósti. Barlyǵy 26,5 myńnan astam ınternet-resýrs jabyldy. 35 myńnan astam kartalyq shot buǵattaldy, 4 myńnan astam adam qylmystyq jaýapkershilikke tartyldy. Osy jyldyń 9 aıynda esirtkige qatysty 6 210 quqyq buzýshylyq anyqtaldy, 26,1 tonna esirtki tárkilendi.
Premer-mınıstr IIM-ge jyl sońyna deıin ákimdikterdiń esirtkige qatysty quqyq buzýshylyqtardyń aldyn alý jónindegi qyzmetin baǵalaýdyń alǵashqy jınaqtalǵan reıtıngin daıyndaýdy tapsyrdy. Densaýlyq saqtaý mınıstrligi esirtkige táýeldi adamdardy emdeý men ońaltýdyń tıimdiligin arttyrýǵa baǵyttalǵan sharalar qabyldandy. Narkologııa boıynsha klınıkalyq hattamalar qaıta qaraldy jáne emdeý sapasynyń halyqaralyq baǵdarlamasy engizilip jatyr.
IIM usynysy sheńberinde Mádenıet jáne aqparat mınıstrligimen, otandyq óndirýshilermen birlesip, halyqty esirtkige arnalǵan qoljetimdi ekspress-testermen, onyń qatarynda áleýmettik osal toptardy tegin qamtamasyz etý máselesin pysyqtaý júkteldi. Bul bastapqy tutyný faktilerin anyqtaıtyn aldyn alý sharasy bolady. Sondaı-aq bir aıda jekemenshik narkologııalyq ońaltý ortalyqtarynyń qyzmetin retteıtin quqyqtyq tásilderdi ázirlep shyǵarý talap etiledi.
Bilim berý salasy tarapynan profılaktıkalyq jumystar qolǵa alynǵan. Tárbıelik fýnksııalardy pedagog-psıhologter men áleýmettik pedagogterdi qosa alǵanda, 360 myń pedagog júzege asyrýda, oqýshylar qaýipsizdik sabaqtarymen 100% qamtylǵan, ata-analardy pedagogıkalyq qoldaýdyń 6,8 myń ortalyǵy jumys isteıdi. Sondaı-aq tıisti ádistemelik usynymdar ázirlendi.
Mádenıet jáne aqparat mınıstri Aıda Balaeva esirtkige qarsy nasıhat boıynsha júrgizilip jatqan jumystar týraly baıandady. Oljas Bektenov profılaktıkalyq jumysty nasıhattaýdyń zamanaýı nysandary men ádisterin qoldaný qajettiligine nazar aýdardy. Tanymal onlaın-platformalarda, kınoteatrlarda, qoǵamdyq kólikterde jáne azamattardyń jappaı jınalatyn oryndarynda áleýmettik jarnamany ornalastyrýdyń mańyzdylyǵy atap ótildi. Osyny eskere otyryp, «Zań men tártip» tujyrymdamasyn júzege asyrý jónindegi aqparattyq jumysty túzetý tapsyryldy.
Budan bólek, Mádenıet jáne aqparat, Jasandy ıntellekt mınıstrlikteri Ulttyq qaýipsizdik komıtetimen birge, maqsatty jarnama men esirtki saıttaryn anyqtaýǵa jáne avtomatty túrde buǵattaýǵa belsendi túrde qosylýy kerek. Sıntetıkalyq esirtkiniń jańa túrlerin anyqtaý úshin Ádilet mınıstrligi Sot saraptamasy organdaryn zamanaýı jabdyqtarmen jaraqtandyrý, sarapshylardy irikteý men daıarlaý, sondaı-aq rásimdi jetildirý men saraptama júrgizý ýaqytyn ońtaılandyrý qajet.
Shekaradaǵy ótkizý pýnktteri qazirgi zamanǵy tekserý quraldarymen, shekaralyq baqylaý men radıomonıtorıngtiń tehnıkalyq quraldarymen qamtamasyz etiledi. О́ńirlerdiń ákimderine nashaqorlyqqa qarsy is-qımyl jónindegi oblystyq shtabtardy basqarý jáne osy jyldyń qazan aıynyń sońyna deıin jergilikti jaǵdaılar men bıýdjetterdiń múmkindikterin eskere otyryp, nashaqorlyqqa qarsy is-qımyl jónindegi naqty sharalardy ázirleý tapsyryldy.
Premer-mınıstr bul sharalardyń barlyǵy keshendi josparda kórinis tabýǵa tıis ekenin atap ótti. Otyrys qorytyndysy boıynsha shtabtyń 2026 jylǵa arnalǵan jumys jospary maquldandy.