Keshe Elbasy Nursultan Nazarbaev «Otan qorǵaýshy» monýmentine gúl shoǵyn qoıý rásimine qatysty. Mereıtoılyq sharaǵa 10 myńǵa tarta adam qatysty. Olardyń arasynda elordalyq jáne óńirlerden kelgen Uly Otan soǵysynyń ardagerleri, Parlament depýtattary, memleket qaıratkerleri, qala qonaqtary men turǵyndary boldy.
Merekelik rásim barysynda, eń aldymen, Uly Otan soǵysy kezinde urys dalasynda qaza tapqan sardarlar men sarbazdardy bir mınýttyq únsizdikpen eske alý sharasy ótti.
Budan keıin Memleket basshysy monýmentke gúl qoıyp, soǵys jáne eńbek ardagerlerimen áńgimelesti. Erliktiń eren úlgisin kórsetken barsha qazaqstandyqty Jeńis kúnimen quttyqtady. «Bul soǵysqa kóp el qatysty, mıllıondaǵan adam maıdan dalasynda qaza tapty jáne sonshasy jaraqat aldy, jaqyndary japa shekti. Biz – jeńimpaz ákelerdiń baqytty urpaǵymyz. Eger, olar jeńiske jetpegende, qazir bizdiń jaǵdaıymyz qandaı bolaryn elestetýdiń ózi qıyn. Qazaqstan búgingideı bolar ma edi, bolmas pa edi? Mynaý aspanymyz osyndaı ashyq bolar ma edi? Mynaý jastarymyz jarqyrap kúler me edi, kúlmes pe edi? Munyń barlyǵy osy ardagerlerimizdiń jeńisi. Demek, maıdangerlerdi ár ýaqytta da qurmettep júrý kerek. Ardagerlerimiz merekede ǵana emes, kúndelikti ómirde de barlyq qurmetke laıyq. Men jastardyń olarǵa árdaıym kómekteskenin, qart ata-analaryn qurmettegenin qalaımyn, bizdiń halyq solaı bolýǵa tıis. Sebebi, erteń sen de qartaıasyń, sonda balalaryń seni de dál solaı syılaıtyn bolady. Osyny umytpasa eken deımin. Ardagerler aramyzda aman-esen uzaq júrip, adamgershilik, moraldyq ustanymdarymen jas býynǵa úlgi bola bersin», – dedi Elbasy.
Osylaı deı kele, Memleket basshysy barsha qazaqstandyqty Jeńistiń 70 jyldyq mereıtoıymen quttyqtap, zor densaýlyq tiledi. «Merekelerińizben, qymbatty qazaqstandyqtar! Árbir otbasyna baqyt, tabys jáne ashyq aspan tileımin!» – dedi Nursultan Nazarbaev.
Bul kúni «Otan qorǵaýshy» monýmenti alańyna jınalǵan qart ardagerlerdiń júzderinen jylylyq esip turǵandaı boldy. Olardyń árqaısysy ózderiniń surapyl soǵys jyldarymen tuspa-tus kelgen jastyq shaqtaryn taǵy bir ret eske alǵandaı kórindi. Máselen, Shyǵys Qazaqstan oblysy, Abaı aýdanynan kelgen Ábilkárim Temirhanov soǵysqa 1941 jyly 10-synypty aıaqtaǵan jyly barypty.
«21 maýsym kúni qolymyzǵa attestat aldyq, al 22 maýsym kúni soǵys bastaldy. Artynsha, biz de Otanymyzdy qorǵaýǵa attandyq. Soǵysty Máskeý túbinen bastadyq. Al 9 mamyrdy Avstrııada qarsy aldyq», – dedi ol. Nurmuhanbet Aqshalov esimdi qarııa ásker qataryna 1941 jyldyń jeltoqsan aıynda shaqyrylǵan eken.
«Men ol kezde nebary 18 jasta edim. Biz surapyl soǵys jyldary Baýyrjannyń dıvızııasynyń quramynda boldyq. Elimizdiń batyry keıin bizdi 28 panfılovshylar dıvızııasyna qosty. Sol tusta, Máskeýde dushpannyń betin qaıtaryp júrgende jaralanyp, 1943 jyldyń 4 qańtarynda gospıtalǵa tústim. 1944 jyldyń 26 tamyzynda úıge oraldym. Elge kelgennen keıin aýylda eńbek etip, soǵysta qalǵan joldastarymyzǵa kómegimizdi kórsettik», – deıdi N. Aqshalov bizben áńgimesinde.
Búginde jasy 93-ke jaqyndap qalsa da, merekelik sharaǵa kelgen soǵys ardageri Turabaı Erejepov bizge tyń bolyp kórindi. Ol 1923 jyly Omby qalasynda týǵan eken. Ásker qataryna 1941 jyldyń jeltoqsan aıynda alynypty.
«Sodan 1945 jylǵa deıin qan maıdannyń bel ortasynda júrdik. Zulmat jyldary 2 ret jaralandym. Alaıda, elime aman-esen oralyp, búgin, mine, Jeńistiń 70 jyldyq mereıtoıyna kýá bolyp otyrmyn. Men 7 ul, 2 qyz ósirip, olardan 28 nemere, 27 shóbere súıdim. Balalarymnyń barlyǵy, Qudaıǵa shúkir, eline hal-qaderinshe eńbek etip keledi», – dedi óz sózinde aqsaqal.
Jalpy, búginde elordada Uly Otan soǵysynyń 206 ardageri turady eken. Olardyń barlyǵyna Jeńis kúni qarsańynda 1 mıllıon 100 myń teńge kóleminde bir rettik kómek kórsetilip, páterlerine kúrdeli jóndeý jumystary júrgizilgen.
Iá, búginde elimizde ardaqty ardagerlerimiz jan-jaqty áspettelip jatyr. О́te oryndy úrdis. О́ıtkeni, olar qandaı qurmetke de laıyq.
Láıla EDILQYZY.
«Egemen Qazaqstan».