Mádenıet jáne aqparat mınıstrligi qazaq jýrnalıstıkasy men poezııasynda ózindik qoltańbasyn qaldyrǵan qalamger, Qazaqstan Jazýshylar odaǵy men Jýrnalıster odaǵynyń múshesi Murat Myrqanuly Tastaǵanovtyń mezgilsiz dúnıeden ótýine baılanysty týystaryna kóńil aıtty, dep jazady Egemen.kz.
Murat Myrqanuly 1953 jyly Shyǵys Qazaqstan oblysy Kúrshim aýdanynyń Saryqamys qystaǵynda dúnıege kelgen.
Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetin támamdap, «Kommýnızm týy» (qazirgi «Dıdar») gazetinde jáne óńirlik BAQ-ta uzaq jyl eńbek etken. «Máńgi jas ǵumyr», «Marqakólim – móp-móldirim, mereıim», «Altyn taý – Altaı» jyr jınaqtarynyń avtory, 60-tan astam ánniń sózin jazǵan.
Ol «Kúrshim aýdanynyń Qurmetti azamaty» atanyp, týǵan ólkesiniń rýhanı ómirine ólsheýsiz úles qosyp, ana tili men ulttyq rýhtyń janashyry boldy. «Qazaq tili» qoǵamynyń О́skemen qalalyq uıymyn basqaryp, sózdiń kıesin, tildiń qadirin ulyqtady. Keıin oblystyq tele-radıokompanııada, Semeıdegi «Ertis óńiri» gazetinde jáne Ámire Qashaýbaev atyndaǵy fılarmonııada qyzmet etip, mádenıet pen ónerdiń damýyna eleýli eńbek sińirgen.
«Murat Myrqanulynyń qalamynan týǵan maqalalary, ulttyq ádebıetimizdiń qazynasyn baıytqan shyǵarmalary el jadynda máńgi saqtalady dep senemiz. Ultyna adal qyzmet etken abzal azamattyń jany jánnatta, ımany salamat bolǵaı», delingen habarlamada.