Keler jyly ótetin fýtboldan álem chempıonatyna qyzyǵýshylyq erekshe joǵary. Halyqaralyq fýtbol jankúıerleri týrnır bastalmaı jatyp-aq 1 mıllıonnan astam bılet satyp alǵan, dep habarlaıdy Egemen.kz NBC News-ke silteme jasap.
11 maýsym men 19 shilde aralyǵynda týrnırdi ótkizetin AQSh, Kanada jáne Meksıkadaǵy satyp alýshylar eń kóp suranysqa ıe bolǵan. Bıletterdi 212 túrli elder men aýmaqtardyń turǵyndary satyp alǵan.
Suranys kólemi boıynsha alǵashqy ondyqqa Anglııa, Germanııa, Brazılııa, Ispanııa, Kolýmbııa, Argentına jáne Fransııa elderi kirdi. Bul memleketterdiń fýtbol jankúıerleri bıletterdi eń kóp satyp alǵandardyń qatarynda.
FIFA bıletterdi qaıta satý platformasynyń iske qosylǵanyn málimdedi. Qazirgi tańda Nıý-Djersı shtatynyń Shyǵys Rýterford qalasynda ótetin fınaldyq matchqa arnalǵan bıletterdiń baǵasy 9 538 dollardan 57 500 dollarǵa deıin jetedi.
Sonymen qatar, eń tómengi baǵadaǵy 60 dollarlyq bıletter shamamen 40 túrli matchqa qoljetimdi bolǵan. Alaıda týrnırdiń basty oıyndaryna suranys joǵary bolǵandyqtan, baǵalar aıtarlyqtaı qymbattap otyr.
Mysaly, Kalıfornııanyń Inglvýd qalasynda ótken AQSh quramasynyń ashylý oıynyna bılet quny 560 dollardan 2 735 dollarǵa deıin ózgerip tur. Tipti 12 maýsymdaǵy ashylý matchyna arnalǵan bir bılet qaıta satý saıtynda 61 642 dollarǵa baǵalanǵan.
Bul joly álem chempıonatynda dınamıkalyq baǵa júıesi alǵash ret qoldanylady, ıaǵnı bılet quny suranysqa qaraı úzdiksiz ózgerip otyrady.
Aıta keteıik, Qazaqstan quramasy 2026 jylǵy álem chempıonatyna qatyspaıdy. Degenmen ulttyq quramanyń FIFA reıtıngindegi kórsetkishi sońǵy aılarda birshama joǵarylaǵan.