Aqtóbe oblysy Áıteke bı aýdanynyń Áıke jáne Tereńsaı aýyldaryna gaz qubyry tartylyp, eki myńǵa jýyq turǵyn pesh jaǵý beınetinen qutyldy. Joba shalǵaı eldimekenderdi gazdandyrý jobasy aıasynda iske asyryldy. Uzyndyǵy 30 shaqyrymnan asatyn qubyr qurylysyn «Erzat» JShS-i júrgizdi. Endi jyl sońyna deıin kórshiles Qııaqty jáne Ulǵaısyn aýyldaryna da kógildir otyn jetedi, dep habarlaıdy Egemen.kz.
«Ústimizdegi jyly Áıteke bı aýdanynyń Áıke, Tereńsaı, Qııaqty jáne Ulǵaısyn aýyldaryna gaz tartý jospary qoıylǵan bolatyn. Qazir eki joba oryndaldy. Endi qys túskenshe Qııaqty men Ulǵaısyn aýyldary da kógildir otynǵa qosylady. Qazirgi ýaqytta eki eldimekende qubyrdy kóshelerge tartý jumysy júrip jatyr. Jer qatyp, kún sýytqansha merdiger jumystaryn aıaqtaıdy dep kútip otyrmyz. Tórt aýyldy qosqanda, aýdanymyzdaǵy kógildir otynǵa qosylǵan eldimekender sany 18-ge jetetin bolady. Bul aýdan turǵyndarynyń 87,5 % -y», dedi Áıteke bı aýdanynyń ákimi Dáýletııar Toǵyzbaev Áıke men Tereńsaıdaǵy gaz qubyryn tartý rásiminde.
Aqtóbe oblysynyń turǵyndar sany 500-den asatyn eldimekenderinde ınfraqurylymdyq jobalar salý jumysy kelesi jyly da jalǵasa beredi.
Aqtóbe oblysy