Bizdiń elimizde 18 qazan – Rýhanı kelisim kúni dep atalady. Osy kúnniń qarsańynda oblys ákiminiń orynbasary Júsip Jumaǵulovtyń qatysýymen óńirdegi 11 konfessııa ókilderi qatysatyn dinı birlestikter kóshbasshylary klýbynyń merekelik otyrysy bolyp ótti dep habarlaıdy Egemen.kz.
Oblys aýmaǵynda qazir 11 konfessııanyń 127 dinı birlestikteri jumys isteıdi.
«Bizdiń klýbymyz 2015 jyldan beri jumys isteıdi. Ol óńirdegi konfessııaaralyq kelisimdi nyǵaıtýǵa qyzmet etedi. Sonymen birge ekstremızm men terrorızmniń aldyn alý sharalary boıynsha pikir almasyp, usynystar jasap otyrady», dedi dinder isi jónindegi basqarmanyń bólim meńgerýshisi Nurtas Nurmaǵanbet.
Búgingi tańda bizdiń elimizde 18 konfessııanyń ókilderi túsinistik pen ózara toleranttyq negizde ómir súrýde.
«Prezıdent jahandyq ózgerister kezeńinde din kóshbasshylary aıryqsha ról atqaratynyn atap ótti. Soltústik Qazaqstan oblysyn túrli din men mádenıet ókilderiniń ózara senim men syılastyq qatynastarynyń mekeni dep sanaýǵa tolyq negiz bar. Bul - memlekettik saıasat pen azamattyq pozısııanyń retti júrgizilýiniń nátıjesi», dedi óziniń sózinde Júsip Jumaǵulov.
Otyrys sońynan rýhanı kelisimge úles qosyp júrgen belsendi azamattarǵa oblys ákiminiń atynan Alǵys hattar men quttyqtaýlar tapsyryldy.
Soltústik Qazaqstan oblysy