Elordadaǵy Ulttyq mýzeıde «Pýshkınnen Sholohovqa deıin: Ýaqyt úndestigi» atty kórme ashyldy. Mádenıet jáne aqparat mınıstrliginiń qoldaýymen Batys Qazaqstan oblysynyń tarıhı-ólketaný mýzeıi uıymdastyrǵan kórme Memleket basshysy Qasym-Jomart Toqaevtyń Qazaqstan halqy Assambleıasynyń bıylǵy sessııasynda bergen tapsyrmalaryn iske asyrý aıasynda ótti.
Is-shara Qazaqstan halqy Assambleıasy tóraǵasynyń orynbasary Dmıtrıı Ostankovıch alǵy sózimen ashyldy. Sonymen qatar Mádenıet jáne aqparat mınıstrligi Mádenıet komıtetiniń tóraǵasy Erlan Dákenov, BQO mádenıet, tilderdi damytý jáne arhıv isi basqarmasynyń basshysy Qýanyshbek Muhanǵalıev, tarıh ǵylymdarynyń kandıdaty, dosent Dámetken Súleımenova sóz sóılep, eleýli is-sharaǵa sáttilik tiledi.
– Bul jaı ǵana mádenı is-shara emes, dáýirlerdiń, urpaqtardyń jáne halyqtardyń baılanysy. Mádenıettiń uly mıssııasyn, ıaǵnı biriktirý jáne rýhanı tutastyqty saqtaý isin jalǵastyryp kele jatqanyn aıqyn kórsetetin jarqyn mysal. Batys Qazaqstan – tarıh pen mádenıetke baı, qasıetti ólke. Dál osy jer Eýropa men Azııanyń túıisken tusy, uly jazýshylar Pýshkın, Tolstoı, Shevchenko, Sholohovtyń sózderi jańǵyryp, máńgilik rýhanı úndestik ornaǵan. Aleksandr Sergeevıch Pýshkınniń esimi – orys ádebıetiniń altyn dińgegi, rýhanı izgiliktiń, gýmanızm men poezııalyq bıiktiktiń sımvoly. Onyń Oral dalasyndaǵy sátteri, halyq turmysynan alǵan shabyt kózderi uly muranyń ajyramas bóligine aınaldy, – dedi Dmıtrıı Ostankovıch.
Atalǵan kórmeni A.S.Pýshkın mýzeıiniń meńgerýshisi Asyljan Myrzabolatova tanystyryp, taqyryptyń tereńine boılady. Kórmede orys halqynyń uly aqyny A.S.Pýshkın men jahanǵa belgili jazýshy M.A.Sholohovtyń qazaq jerindegi shyǵarmashylyǵy men ádebı murasy kórermen nazaryna usynylǵan. Ekspozısııada XIX–XX ǵasyrlardaǵy muraǵattyq derekter, sırek fotosýretter, qoljazbalar men basylymdar, sondaı-aq aqyn men jazýshy turmysta qoldanǵan zattarǵa kýá bolasyz. Boıyna syr búkken jádigerler ulttar arasyndaǵy ádebı kópirdi sezinýge múmkindik týǵyzady.
Pýshkınniń 1833 jyly Oral óńirine jasaǵan sapary – orys ádebıetiniń tarıhyndaǵy eń shynaıy ári taǵdyrly betburystardyń biri. Aqyn qazaq dalasyna tek zertteýshi retinde emes, rýhanı izdenis ústinde kelgen bolatyn. Aqjaıyqtyń keń dalasy, halyqtyń qonaqjaı minezi men erlikke toly shejiresi danyshpanǵa oı salǵan. Osy sapar áserinen «Kapıtan qyzy» men «Pýgachev tarıhy» sııaqty shyǵarmalary dúnıege keldi.
Al jazýshy Mıhaıl Sholohov úshin qazaq dalasy soǵys jyldaryndaǵy ómiriniń bir bóligine aınalǵan qasıetti meken. Uly Otan soǵysy kezinde jazýshynyń otbasy osy óńirde turǵan, dál sol kezde ol «Adam taǵdyry» men «Tynyq Don» shyǵarmalarynyń bólimderin jazyp, keıipkerleriniń taǵdyryn halyqtyń shynaıy turmysymen baılanystyrdy. Qazaq jerindegi keńdik pen adam janynyń beriktigi, darqandyǵy týyndylaryna erekshe tynys bergeni daýsyz. Sondyqtan da qazaq dalasy Sholohov úshin shabyttyń bastaýy ǵana emes, ekinshi Otany ispetti boldy desek artyq emes.
Batys Qazaqstan óńirinen jetkizilgen júzden astam jádiger – eki halyqtyń ortaq rýhanı tarıhynyń únsiz kýágeri. Árbir eksponatta – ótken dáýirdiń izi, mádenıettiń tynysy, adam men jer arasyndaǵy máńgilik baılanys jatyr. Bolashaqta qos halyq arasyndaǵy ádebı sabaqtastyq jalǵasyn taba bereri daýsyz.