Qazan aıynyń úshinshi jeksenbisinde Orman sharýashylyǵy qyzmetkerleri kúni atalyp ótedi. Bul kún – tabıǵattyń baılyǵyn saqtap, ony urpaqtan-urpaqqa amanat etý jolynda eńbek etip júrgen beınetkesh qaýymǵa degen qurmettiń belgisi. Orman – elimizdiń baǵa jetpes baılyǵy, tabıǵattyń tynysy, turǵyndardyń tirshilik kózi. Prezıdent Qasym-Jomart Toqaev tal egý, ormandy alqaptardy saqtaý, ulǵaıtý isine erekshe nazar aýdaryp otyr. Memleket basshysynyń tapsyrmasymen jaqyn jyldary elimizdiń orman alqaptarynda 2 mlrd, eldi mekenderde 15 mln aǵash otyrǵyzylady.
Elimizde biraz jyldardan beri júıeli túrde júzege asyrylyp kele jatqan «Jasyl el» baǵdarlamasy bar. Jyl saıyn «Búkilhalyqtyq aǵash otyrǵyzý kúni» ekologııalyq aksııasy ótkiziledi. Aksııanyń maqsaty – ormandardy saqtaý, qalpyna keltirý, kóbeıtý, aýyl, aýdan, aımaqtardy abattandyrý. Keıingi kezeńde «Taza Qazaqstan» jalpyulttyq aksııasy aıasynda da jer-jerlerde kógaldandyrý, tal kóshetterin otyrǵyzýǵa qatysty kóptegen jumys atqaryldy. Orman qorlaryn saqtaý, kóbeıtý jónindegi sharalar barshamyz úshin eń áýeli Jer-Anamyzdy saýyqtyrý úshin asa qajet. Orman – ult baılyǵy, adamzattyń amanaty. Ony qorǵaý – tek osy salada eńbek etetin maman, jumysshylardyń ǵana emes, árbir sanaly azamattyń paryzy.