19 qazan elimizde Qutqarýshylar kúni atalyp ótedi. Bul el tynyshtyǵyn kúzetip, ot pen sýdyń ortasynda júrgen jandardyń eńbegine taǵzym eter kún. Olar kún saıyn óz ómirin qaýipke tigip, ózgeniń ómirin arashalap qalady. Osyndaı erlerdiń biri – Soltústik Qazaqstan oblysy Tótenshe jaǵdaılar departamentiniń Petropavl qalasy Tótenshe jaǵdaılar basqarmasyna qarasty №2 mamandandyrylǵan órt sóndirý bóliminiń komandıri Rýslan Rústemuly Kóbetaev. Kúni keshe ol Raqymjan Qoshqarbaev atyndaǵy III dárejeli «Aıbyn» ordenimen marapattaldy, dep jazady Egemen.kz.
Rýslan Kóbetaev qyzmet jolyn 2014 jyly Astana qalasynda bastaǵan. Ol alǵashqy kúnnen-aq bul salanyń jaı mamandyq emes, ómirlik mindet ekenin túsingen. Keıin Soltústik Qazaqstan oblysyna aýysyp, Petropavldaǵy órt sóndirý bóliminde komandırlik qyzmetke taǵaıyndaldy. Osy on jyldan astam ýaqyt ishinde talaı qaýip-qaterdiń ortasynda júrip, talaı adamnyń ómirin saqtap qalǵan.
«Bizdiń qyzmet – sekýndpen ólshenetin jumys. О́rt kezinde árbir sheshimniń artynda adam taǵdyry tur. Sol sebepti komandır retinde basty mindetim – durys sheshim qabyldaý jáne áriptesterge naqty baǵyt berý. Qıyn jaǵdaıda salqynqandylyq pen tájirıbe ǵana emes, rýhanı daıyndyq ta qajet», deıdi Rýslan Rústemuly.
3 tamyz kúni Petropavl qalasynda bolǵan órt oqıǵasy onyń esinde erekshe saqtalǵan. Tún ortasynda kópqabatty turǵyn úıdiń bir páterinen órt shyǵyp, qoıý tútin men jalyn búkil qabatty sharpyǵan. Oqıǵa ornyna jetken Rýslan Kóbetaev jaǵdaıdyń kúrdeli ekenin birden ańǵarǵan.
«Gaz-tútinnen qorǵaý zvenosyn dereý iske qostyq. О́rttiń taralý baǵytyn anyqtap, ózim topty bastap páterlerge kirdim. Tútin qoıý, temperatýra joǵary, biraq adamdardyń úni estiledi. Sol baǵytqa umtyldyq. Eń bastysy – saspaýdy úırený. Ár sekýnd sanaýly edi. Ondaı sátte oıyńda bir ǵana nárse – adamdardy qutqarý. О́rt degen tek jalyn emes, ol adamnyń úmiti synalatyn sát», dep eske aldy ol.
Rýslan Kóbetaev úshin bul marapat jeke eńbektiń emes, búkil ujymnyń ortaq jetistigi.
«Árıne, kez kelgen azamat úshin Prezıdenttiń qolynan marapat alý – úlken abyroı. Biraq bul meniń ǵana emes, menimen birge kún saıyn órtke kirip, adamdardy qutqaryp júrgen jigitterdiń eńbeginiń baǵalanýy. Bul orden bizge odan ári de senimdi aqtap, jumysty joǵary jaýapkershilikpen atqarý mindetin júkteıdi», deıdi keıipkerimiz.
Qutqarýshy mamandyǵy syrt kózge batyrlyqtyń sımvoly bolyp kóringenimen, onyń artynda tynymsyz eńbek pen temirdeı tártip jatyr. Rýslan sekildi jalynmen betpe-bet kelip, úmit otyn óshirmeıtin jandar barda, el júregi tynysh soǵady.