Almatydan kelgen Natalııa Sas atyndaǵy Memlekettik akademııalyq orys balalar men jasóspirimder teatry alǵash ret Máskeýde, Reseı akademııalyq jastar teatry sahnasynda óner kórsetti. Bul gastroldik baǵdarlama Qazaqstannyń Reseıdegi Mádenıet kúnderi aıasynda ótti, dep habarlaıdy Egemen.kz.
Teatr máskeýlik kórermenge eki qoıylym usyndy – «Sas. Bir repetısııanyń shejiresi» jáne «Rýslan men Lıýdmıla».
Rejısser Galına Pıanova atap ótkendeı, gastrol – Natalııa Ilınıchna Sastyń 80 jyldyq shyǵarmashylyq murasyna qurmet kórsetý aıasynda uıymdastyryldy.
– Bul – Natalııa Ilınıchnaǵa degen súıispenshilik pen iltıpattyń kórinisi. Ol balalar teatrynyń negizin qalap, birneshe býyndy tárbıelegen uly tulǵa, – dedi ol.
Spektaklde Natalııa Sastyń rólin aktrısa Tatıana Kostıýchenko somdady.
– Ol – uly rejısser, orasan talant ıesi. «Tárbıeleý – adamnyń taǵdyryn sheshý» degen onyń sózi meniń súıikti dáıeksózim. Sas óz ómirin teatr men jas urpaq tárbıesine arnady, – dedi aktrısa.
Qazaqstannyń halyq artısi Olga Korjeva da bul spektakldiń erekshe mánge ıe ekenin atap ótti.
– Biz Natalııa Sas teatrynyń ashylýyna arnalǵan repetısııany sahnaǵa shyǵaramyz. Bul – teatr tarıhynyń bir bólshegi jáne Máskeý kórermenimen bólisetin rýhanı baılanys, – dedi ol.
Teatrdyń jetekshi akteri Maqsat Sahıulynyń aıtýynsha, bul gastrol shyǵarmashylyq izdenis pen mádenı úndestiktiń nátıjesi.
– Kópshilik balalar teatry týraly biledi, biraq onyń negizin qalaǵan tulǵa jaıly az habardar. Biz bul ról arqyly onyń ómirine úńildik. Ol opera qoıylymdaryn sahnalaǵan tuńǵysh áıel rejısser bolǵan, – dedi ol.
Teatr dırektory, Qazaqstannyń eńbek sińirgen qaıratkeri Oleg Gostevtiń aıtýynsha, gastrolge daıyndyq 12-14 aıǵa sozylǵan.
– Biz Máskeýge teatrdyń eń tanymal qoıylymdaryn alyp keldik. Úlken shyǵarmashylyq ujym, tehnıkalyq jáne sahnalyq top tolyq qurammen keldi, – dedi ol.
Bas rejısser Irına Sımonova Astanada ótetin teatrdyń 80 jyldyǵyna arnalǵan mereıtoılyq qoıylymdarda da Natalııa Sas týraly spektakl kórsetiletinin aıtty.
Qazaqstannyń Reseıdegi elshiliginiń habarlaýynsha, máskeýlik kórermen qazaqstandyq ártisterdiń ónerin jyly qabyldady.
Elshi Dáýren Abaev bul gastroldi Qazaqstan men Reseı arasyndaǵy dostyq kúntizbesindegi mańyzdy mádenı oqıǵa dep atady.
– Máskeýlik kórermender qazaqstandyq teatr ujymynyń shyǵarmashylyq sheberliginen keremet áser alady dep senemin, – dedi elshi.