Qorǵanys mınıstri Dáýren Qosanov pen «Otbasy bank» basqarma tóraǵasy Lázzat Ibragımova áskerı qyzmetkerlerdi turǵyn úımen qamtamasyz etý jáne «Áskerı baspana» baǵdarlamasyn qaıta jandandyrý joldaryn talqylady. Kezdesý barysynda áskerı ıpotekanyń tıimdiligin arttyrý men turǵyn úıge qoljetimdilikti jeńildetý máseleleri kóterildi, dep habarlaıdy Egemen.kz.
Qorǵanys mınıstrliginde ótken kezdesýde Dáýren Qosanov áskerı qyzmetshilerdiń áleýmettik jaǵdaıy mınıstrliktiń basty basymdyqtarynyń biri ekenin atap ótti.
Kezdesýdiń negizgi taqyryptarynyń biri – «Áskerı baspana» baǵdarlamasyn qaıta iske qosý boldy. Bul bastama áskerı qyzmetshilerge jeńildetilgen sharttarmen baspana alýǵa múmkindik berip, turǵyn úı tapshylyǵyn azaıtýǵa baǵyttalady.
«Áskerı qyzmetshiler úshin jeńildetilgen ıpotekalyq nesıelerge naqty qoljetimdilik mańyzdy. Qazirgi ýaqytta ondaı múmkindik joq, al turǵyn úı baǵasynyń ósýinen bastapqy jarna jınaý is júzinde múmkin emes», dep atap ótti Qorǵanys mınıstri.
Sonymen qatar mınıstr «Otbasy bank» mobıldi qosymshasynyń jumysyn turaqtandyrýdaǵy jedel áreketi úshin Lázzat Ibragımovaǵa alǵysyn bildirdi. Sondaı-aq «Baspana.kz» portalyndaǵy jańa talaptardyń keıbir áskerı qyzmetshiler úshin qıyndyq týǵyzatynyn atap ótti.
Dáýren Qosanov burynǵydaı ekinshi deńgeıli turǵyn úı naryǵynan baspana alý múmkindigin qalpyna keltirýdi de usyndy. Onyń pikirinshe, áskerı qyzmetkerler daıyn, ınfraqurylymy qalyptasqan jáne qyzmet ornyna jaqyn páterlerdi kóbirek qalaıdy.
Mınıstrdiń aıtýynsha, 15 myńnan astam áskerı qyzmetshi otbasy turǵyn úı tólemderi júıesi men ıpotekalyq baǵdarlamalar, sonyń ishinde «Áskerı baspana» arqyly turǵyn úı jaǵdaıyn jaqsartqan.
Kezdesý sońynda Qorǵanys mınıstrligi men «Otbasy bank» áskerı qyzmetshilerdiń turǵyn úı máselesin keshendi túrde sheshý úshin birlesken is-qımyl josparyn daıyndaýǵa ýaǵdalasty.