Keńes Odaǵynyń sport sheberi, teńiz kópsaıysy men shańǵy jarystary boıynsha sheber atanǵan, sondaı-aq polıatlon, prezıdenttik jáne qysqy kópsaıys túrlerinen Qazaqstan chempıony ári birneshe dúrkin júldegeri Vladımır Krıvensov Zaılıı Alataýynda ótken jarys kezinde ómirden ótti, dep habarlaıdy Egemen.kz.
Oqıǵa týraly aqparatty jarys uıymdastyrýshylary ózderiniń Instagram paraqshasynda jarııalady.
«Búgingi júgirý kezinde qaıǵyly jaǵdaı oryn aldy. Bizdiń qatysýshymyz — 70 jastaǵy Vladımır Krıvensov qaıtys boldy», delingen habarlamada.
Habarlamada aıtylǵandaı, qaıǵyly oqıǵa starttan keıin kóp uzamaı bolǵan. Oqıǵa ornyna birneshe mınýt ishinde jetken TJD qyzmetkerleri alǵashqy medısınalyq kómek kórsetip, zardap shekken adamdy «Medeý» kesheniniń qutqarý bólimshesine jetkizgen. Alaıda barlyq sharalarǵa qaramastan, ony aman alyp qalý múmkin bolmady.
Uıymdastyrýshylardyń aıtýynsha, Vladımır tájirıbeli sportshy bolǵan, túrli jarystardyń turaqty qatysýshysy edi. Jarysqa deıin medısınalyq tekserýden ótip, sportpen aınalysýǵa eshqandaı qarsy kórsetilim bolmaǵan.
«Ol árdaıym startqa júzinde kúlkimen shyǵatyn, belsendi ómir saltynyń úlgisi edi. Kópshiligimiz úshin ol rýhtyń kúshi men shabyttyń sımvoly — sporttyń jasqa qaramaıtynyn dáleldegen jan bolatyn», dep jazdy uıymdastyrýshylar.
Almatylyqtar da pikirlerinde Vladımır Krıvensovty meıirimdi, janashyr adam ári jastarǵa da, sport ardagerlerine de úlgi bolarlyq tulǵa retinde eske aldy.
Eske sala keteıik, jarys Zaılıı Alataýynda ótti. Qatysýshylarǵa bes túrli qashyqtyq usynylǵan: T1, Mynzhylky, Alplager, Gorelnik jáne Canicross (ıtpen júgirý). Salomon Trail 2025 — «Qazaqstannyń Skaıranneri» ataǵy men belgisin alý úshin ótetin serııanyń alǵashqy kezeńi boldy.