QR Mádenıet jáne aqparat mınıstrligi ulttyq kınony damytý men ony álemdik deńgeıde tanytý baǵytyndaǵy jumystardy júıeli túrde jalǵastyryp keledi. 2020–2025 jyldar aralyǵynda Ulttyq kınony qoldaý memlekettik ortalyǵy túrli janrdaǵy 119 kınojobany júzege asyrdy. Osy kezeńde qazaqstandyq fılmder 300-den astam halyqaralyq festıvalge qatysyp, 177 marapatqa ıe bolǵan, dep habarlaıdy Egemen.kz.
Mınıstrliktiń málimetinshe, sońǵy eki jylda úsh pıtchıng uıymdastyrylyp, sonyń nátıjesinde 57 jobanyń 40-y jas rejısserler men ssenarısterdiń qatysýymen túsirilip jatyr.
«2024 jyly konkýrsqa irikteý erejeleri qaıta qaralyp, prosess ashyq ári tıimdi boldy. Basym taqyryptar belgilenip, ssenarıı ázirleý merzimi qysqardy. Qujattardy elektrondy túrde qabyldaý engizilip, Sarapshylar keńesiniń daýys berý mehanızmi jetildirildi. Bul ózgerister qazaq tilindegi ssenarııler úlesin 75%-ǵa jetkizip, rejısserlerdiń qatysýyn arttyrdy», delingen habarlamada.
Memlekettik qoldaýdyń naqty nátıjesi retinde «Qaitadan» fılmi aıryqsha ataldy. Kartınanyń otandyq prokattaǵy tabysy 1 mıllıard teńgeden asyp, salynǵan ınvestısııany bes esege qaıtarǵan.
Sonymen qatar 2025 jyly jańa talanttardy anyqtaý maqsatynda «JARQYRA» respýblıkalyq kastıngi bastaý aldy. Joba óńirlerdegi jas akterlerge úlken ekranda óner kórsetýge múmkindik berip, qazaq kınosynyń jańa býynyn qalyptastyrýǵa jol ashty.
«Qazaq kınosynyń onkúndigi» aksııasy aıasynda otandyq fılmderdiń kórsetilimi Qaraǵandy, Jambyl, Soltústik Qazaqstan, Batys Qazaqstan jáne Jetisý oblystarynda ótkizildi. Otandyq fılmder kórermenge qoljetimdi bola tústi. Qazir olar tek kınoteatrlarda ǵana emes, onlaın platformalarda da kórsetiledi. «Kınopoısk» platformasymen birlesip, 17 qazaqstandyq fılmnen turatyn arnaıy jınaq daıyndaldy. Oǵan «Patrıottar ýaqyty», «Kanıkýly off-line 2», «Dos-Muqasan», «Qajymuqan» jáne basqa da týyndylar kiredi. Bul shara qazaqstandyq kınematografııanyń tanymaldylyǵyn arttyrýǵa jańa múmkindikter ashyp otyr», delingen habarlamada.
Halyqaralyq deńgeıde de qazaq kınosynyń bedeli artyp keledi. Sońǵy 30 jylda alǵash ret Qazaqstan Kann kınofestıvali aıasyndaǵy Marché du Film kınonaryǵyna qatysyp, KazakhCinema ulttyq stendi arqyly otandyq jobalardy tanystyrdy. Kannda Fransııa jáne Grýzııanyń ulttyq kınoortalyqtarymen, al Aqtaýda Ázerbaıjan, Qyrǵyzstan, Túrkııa, Túrikmenstan jáne О́zbekstannyń kıno uıymdarymen yntymaqtastyq jóninde kelisimder jasaldy.
Sondaı-aq Lokarno men Pýsan festıvalderinde kórsetilgen «Skazka o morskıh psah» derekti fılmi men «Pobedıteleı vıdno na starte» atty birlesken joba halyqaralyq kórermenniń joǵary baǵasyna ıe boldy.