Qazaqstanda sońǵy jyldary mádenıet pen aqparat salasynda júıeli jańǵyrtý júrip jatyr. Arhıv isi men kitaphana salasyn damytý, qujattyq murany saqtaý jáne jańa býyn mamandardy daıarlaý – Mádenıet jáne aqparat mınıstrliginiń basym baǵyttarynyń birine aınaldy, dep habarlaıdy Egemen.kz.
Mádenıet jáne aqparat mınıstrliginiń málimetinshe, búgingi tańda el aýmaǵynda Prezıdent Arhıvin jáne birneshe iri óńirlik ortalyqtardy qamtıtyn 236 arhıv mekemesi jumys isteıdi. Ulttyq arhıv qorynda 74,5 myń qordy qamtıtyn 27,8 mıllıonnan astam saqtaý birligi bar.
Kitaphana jáne arhıv salasyna mamandar daıarlaý isi de keńeıip otyr. «Kitaphana isi, aqparatty óńdeý jáne arhıv isi» baǵyty boıynsha joǵary bilim granttarynyń sany sońǵy jyly eki esege artyp, bakalavrıat boıynsha 20-dan 100-ge deıin ósti. Buǵan qosa, bes óńirdiń oqý oryndaryna qosymsha 89 grant bólinip, jas mamandardy qoldaýdyń jańa múmkindikteri ashyldy.
Jambyl oblysyndaǵy Qordaı jáne Jambyl aýdandyq arhıvteriniń, Aqtóbe oblysyndaǵy Temir aýdandyq arhıviniń, sondaı-aq Astanadaǵy Qazaqstan Respýblıkasy Prezıdenti Arhıviniń jańa ǵımarattary paıdalanýǵa berildi.
«Memlekettik qoldaý quraldaryn jetildirý maqsatynda 2023 jyly Qazaqstan Respýblıkasynyń Prezıdenti bastamasymen jas jazýshylar men aqyndarǵa arnalǵan Prezıdenttik arnaýly ádebı syılyq taǵaıyndaldy. Syılyq «Proza», «Poezııa», «Balalar ádebıeti» jáne «Dramatýrgııa» nomınasııalary boıynsha beriledi. Ár nomınasııa boıynsha júlde qory – 4,1 mıllıon teńge. Memleket basshysynyń 2023 jyly Túrkistanda ótken Ulttyq quryltaıda bergen tapsyrmasyna sáıkes, «Qazaqstannyń halyq jazýshysy» qurmetti ataǵyn qaıta engizý maqsatynda 2023 jylǵy 16 qazanda «Qazaqstan Respýblıkasynyń memlekettik nagradalary týraly» Zańǵa ózgerister men tolyqtyrýlar engizildi. Bul ulttyq ádebıettiń damýyna eleýli úles qosqan qalamgerler eńbeginiń resmı baǵalanýy», delingen habarlamada.
2025 jyly Memleket basshysynyń bastamasymen belgilengen Ulttyq kitap kúni alǵash ret atalyp ótip, otandyq avtorlardy qoldaý men oqyrman mádenıetin damytýǵa baǵyttalǵan «Ulttyq kitap» baıqaýy uıymdastyryldy.
Tarıhı jadyny saqtaý isinde de jańa bastamalar qolǵa alyndy. «Batyrlarǵa taǵzym» atty veb-portal iske qosylyp, onda Uly Otan soǵysyna qatysqan 690 myńnan astam jaýynger týraly málimetter toptastyrylǵan. Olardyń qatarynda 365 Keńes Odaǵynyń Batyry, eki márte batyr atanǵan tórt jaýynger jáne Dańq ordeniniń 19 ıegeri bar. Qorǵanys mınıstrligimen birlesip 6 615 qazaqstandyq áskerı tutqyn jónindegi derekter engizildi. Sondaı-aq, KAZNEB platformasynda maıdanger jazýshylardyń eńbekteriniń aýdıo nusqalary jarııalandy.
«Arhıv – 2025» jobasy aıasynda 14 elden myńnan astam biregeı tarıhı qujat jınaldy. Arhıv materıaldaryn saqtaý men biryńǵaı elektrondyq arhıvtiń quqyqtyq negizin qalyptastyrýǵa baǵyttalǵan jańa zań jobasy ázirlenip jatyr. Osy jyly QR Ulttyq arhıvi halyqaralyq yntymaqtastyqty belsendi túrde damytty. Saýd Arabııasy, Reseı, Lıtva jáne Túrkııa elderiniń arhıv qyzmetterimen memorandýmdarǵa qol qoıylyp, qujattyq murany sıfrlandyrý jáne saqtaý baǵytyndaǵy birlesken jobalar júzege asyryldy. Tamyz aıynda О́zbekstannyń Buhara qalasynda Qazaqstan arhıvteri kúni ótip, onda «О́zbekstan men Qazaqstannyń arhıvtik qujattaryndaǵy mádenı yntymaqtastyq» birlesken basylymy tanystyryldy. Maýsym aıynda Máskeý qalasynda «Uly Otan soǵysyndaǵy qazaqstandyqtardyń erligine arnalǵan qujattyq kýálik» fotoalbomy usynyldy», delingen habarlamada.
Sonymen qatar, Qazaqstan Jazýshylar odaǵy «Jańa Qazaqstannyń ádebı-tanymdyq panoramasy», «Jazýshylardyń ádebı sheberlik mektebi» jáne qazaq ádebıetin TMD arhıvterinde zertteý baǵdarlamasy sekildi iri jobalardy júzege asyryp jatyr.