Astanada erekshe qajettilikteri bar adamdar arasynda II shahmat olımpıadasy ótip jatyr. Is-sharanyń ashylýyna Memlekettik keńesshi Erlan Qarın, Týrızm jáne sport mınıstriniń orynbasary Serik Jarasbaev, Halyqaralyq shahmat federasııasynyń (FIDE) prezıdenti Arkadıı Dvorkovıch jáne Qazaqstan shahmat federasııasynyń prezıdenti Tımýr Týrlov qatysty, dep jazady Egemen.kz.
Memlekettik keńesshi Prezıdent Qasym-Jomart Toqaevtyń olımpıada qatysýshylaryna arnaǵan quttyqtaý sózin oqyp berdi. Memleket basshysynyń sózinde elimizdiń ınklıýzıvtilik qaǵıdaty negizinde shahmatty jan-jaqty damytýǵa belsendi úles qosyp jatqany aıtylǵan. Atalǵan olımpıada memleketimizdiń shahmatqa aıryqsha kóńil bóletinin bildirip qana qoımaı, sondaı-aq Ádiletti Qazaqstan tujyrymdamasyna saı barshaǵa teń múmkindikter usyný qaǵıdatyn ilgeriletýge beıil ekenin kórsetedi.
Erlan Qarın óz sózinde memlekettiń júrgizip otyrǵan áleýmettik saıasatynda azamattardyń barlyǵyna teń jaǵdaı jasaýǵa basa mán beriletinin jetkizdi. Múmkindigi shekteýli jáne erekshe bilim alý qajettiligi bar adamdar úshin júıeli ári keshendi sharalar qabyldanyp jatyr.
Shahmat olımpıadasynda álemniń 32 elinen kelgen 35 komanda baq synaıdy. Olardyń qatarynda Polsha (2023 jylǵy shahmat olımpıadasynyń jeńimpazy), Majarstan, Germanııa, Izraıl, Soltústik Makedonııa, Serbııa, Ýkraına, Horvatııa, Chehııa, Bangladesh, Úndistan, Mıanma, BAÁ, О́zbekstan, FIDE-1, Fılıppın, Argentına, Venesýela, Kolýmbııa, Panama, AQSh, Chılı, Kýba, Mysyr, Zambııa, Zımbabve, Kenııa jáne Ýganda elderiniń quramalary bar. Al jarysty uıymdastyrýshy el retinde Qazaqstannan eki quram óner kórsetip jatyr.
II Shahmat olımpıadasy – «tórtke tórt» formatyndaǵy komandalyq jarys. Aralas komandalar úsh sanattaǵy oıynshylardan quryla alady: estý qabileti buzylǵandar, kórý qabileti buzylǵandar jáne tirek-qımyl apparaty zaqymdanǵandar (TQAZ). Ár komandada kem degende bir áıel oıynshy jáne qajet bolǵan jaǵdaıda, kem degende eki halyqaralyq shahmat federasııasy (FIDE) reıtıngindegi oıynshy bolýǵa tıis.
Shahmat olımpıadasy qazannyń 20-26 kúnderi ótedi.