Qytaıdyń Nınbo qalasynda ótken WTA 500 halyqaralyq týrnıriniń bas júldesin elimizdiń birinshi raketkasy E.Rybakına jeńip aldy. Osy tolaıym tabystyń arqasynda Elena aptanyń basynan resmı túrde álemniń jetinshi raketkasy bolady.
Týrnırdiń birinshi aınalymynda bos bolǵan E.Rybakına ekinshi týrda ýkraınalyq tennısshi Daıana Iаstremskaıamen (№30 WTA) kezdesti. Asa tartysty ótken oıyn jerlesimizdiń paıdasyna sheshildi, esep – 6:4, 6:7(6), 6:3. Shırek fınalda Elena aýstralııalyq Aıla Tomlıanovıchti (№104) tas-talqan etip utty – 6-2, 6:0. Jartylaı fınalda ejelgi qarsylasy, ıtalııalyq Jasmın Paolınıdi de erkin eńserdi, esep – 6:3, 6:2. Sheshýshi kezdesýde reseılik Ekaterına Aleksandrovany úsh sette, 3:6, 6:0, 6:2 esebimen jeńdi.
Nınbo korttarynda burnaǵy oıynyn tapqandaı, barynsha jınaqy oınap, sheberliktiń naǵyz úlgisin kórsetken Elena qorjynyna 500 reıtıngtik upaı salyp, 101 000 dollar (54 259 220 teńge) tabys tapty. Sóıtip, 1–8 qarasha aralyǵynda Er-Rııad (Saýd Arabııasy) qalasynda óte-tin jyldyń qorytyndy týrnıri-ne qatysý múmkindigi arta tústi.
Jalpy, bul jeńis E.Rybakınanyń bıylǵy maýsymdaǵy ekinshi jetistigi. Mamyr aıynyń basynda ol Fransııanyń Strasbýrg qalasynda ótken WTA 500 sanatyndaǵy týrnırde top jarǵan bolatyn.
Qazirde E.Rybakına 4505 reıtıngtik upaıǵa ıe, onyń eń jaqyn izbasarlarynda sáıkesinshe 4449, 4319 upaı bar. Sondaı-aq reıtıngte altynshy orynda turǵan Jasmın Paolınıden bar-joǵy 20 upaıy kem ekenin de aıta ketken jón.