Premer-mınıstr Oljas Bektenov tóraǵalyq etetin Sıfrlyq shtab Memleket basshysynyń bıylǵy Joldaýynda qoıylǵan mindetterdi jedel ári júıeli túrde júzege asyrý jumysyn júrgizip jatyr.
Shtab biryńǵaı sıfrlyq ekojúıe qalyptastyrýǵa, kreatıvti ındýstrııany damytýǵa, IT-startaptar men joǵary oqý oryndaryn qoldaýǵa baǵyttalǵan birqatar sheshim qabyldady. Osyǵan oraı birqatar memlekettik organǵa tapsyrma júkteldi.
Iаǵnı Qarjy, Ulttyq ekonomıka, Jasandy ıntellekt jáne sıfrlyq damý mınıstrlikteri jergilikti atqarýshy organdarmen birge, «Astana Hub halyqaralyq IT-startaptar tehnoparki» korporatıvtik qoryn óńirlik ınnovasııalar jáne kásipkerlik ortalyǵy retinde nyǵaıtý úshin osy jylǵy 10 qarashaǵa deıin aqparattyq-kommýnıkasııalyq tehnologııalar salasyndaǵy basym qyzmet túrleriniń tizbesi keńeıtiledi.
Azamattar úshin qolaıly ári qaýipsiz sıfrlyq orta qalyptastyrý maqsatynda memlekettik organdar men olarǵa vedomstvolyq baǵynysty uıymdar jeke mobıldi qosymshalardy ázirleýge tyıym salýy jáne olardyń tek eGov jáne Aitu platformalarynda júzege asyrylýy qamtamasyz etiledi.
«Alem.cloud» ulttyq sýperkompıýter ortalyǵynda esepteý resýrstaryn bólý qaǵıdalary bekitilip, sodan keıin tıisti normatıvtik quqyqtyq akt ázirlenedi. Ǵylym jáne joǵary bilim mınıstrligi qoldanystaǵy tetikter sheńberinde JOO-larǵa qoldaý kórsetýdi qamtamasyz etedi.
Sıfrlyq shtabtyń sheshimimen memlekettik organdarǵa Astana Hub IT-startaptar tehnoparki qyzmetiniń basym túrleriniń tizbesine mýltımedıa, oıyndardyń dızaınyn jasaý men basyp shyǵarý, baǵdarlamalyq qamtamasyz etýdi engizý, súıemeldeý men túrlendirý, kıbersport salasyndaǵy qyzmetter sııaqty tanymal baǵyttardy qosý tapsyryldy. Budan basqa, atalǵan tizbe QR rezıdenti emesterge baǵdarlamalyq qamtýdy paıdalana otyryp, bıznes-prosester aýtsorsıngi, aǵylshyn tilin oqytý sııaqty qyzmettermen tolyqtyryldy. Qyzmetter aıasyn keńeıtý Astana Hub-tyń jahandyq tehnologııalyq qoǵamdastyqty tartý ortalyǵy retindegi ustanymyn kúsheıte túsedi.
Yńǵaıly ári qaýipsiz sıfrlyq ortany qalyptastyrý maqsatynda barlyq memlekettik mobıldi servıster SuperApp qaǵıdaty boıynsha eGov jáne Aitu ekojúıelerine kezeń-kezeńimen biriktirilmek. Integrasııa mobıldi qosymshalardyń bytyrańqylyq máselesin joıady, úderisterdi jedeldetedi ári halyqqa memlekettik qyzmetter kórsetý sapasyn arttyrady.
«Alem.cloud» sýperkompıýterlik ortalyǵynyń esepteý resýrstaryn bólý erejelerin bekitý Astana Hub startaptary, ǵylymı uıymdar men ýnıversıtetter, memlekettik organdar men olardyń vedomstvolyq baǵynysty uıymdary, sondaı-aq sheteldik kompanııalardy qosa alǵanda, jeke sektor jobalary úshin joǵary ónimdi qýattarǵa qol jetkizýdiń naqty ári aıqyn tetigin qalyptastyrady.
«Alem.cloud» qýatyn paıdalanýǵa berýdiń basym baǵyttary jasandy ıntellektiniń ulttyq damý mindetterin eskere otyryp anyqtalady ári bilim berý, densaýlyq saqtaý, aýyl sharýashylyǵy, sýmen jabdyqtaý, memlekettik basqarý, munaı-gaz salasy, taý-ken metallýrgııa kesheni, energetıka, geologııalyq barlaý, kólik jáne logıstıka, ónerkásip, qurylys, robottehnıka men taǵy da basqa salalardy qamtıdy.