Qazaqstanda dári-dármek baǵasyn qalyptastyrý júıesi qaıta qaralyp, artyq shyǵyndar joıyldy. Nátıjesinde balama preparattardyń quny túpnusqa dárilerge qaraǵanda 30 paıyzǵa deıin arzandady. Tek eń joǵary shyǵyndy TOP-20 dári túri boıynsha kútiletin únem kólemi 12 mlrd teńgegeni quraıdy, dep habarlaıdy Egemen.kz.
«Jalpy alǵanda TMKKK jáne MÁMS sheńberinde shekti baǵalardyń tómendeýi shamamen – 19%, al kóterme jáne bólshek saýda segmentterinde – 30%», dep habarlady Úkimettiń baspasóz qyzmeti.
Sonymen qatar dárilik zattardy tirkeý merzimi aıtarlyqtaı qysqartyldy. Endi bul prosess 100 jumys kúni ishinde aıaqtalady. Al AQSh, Eýropalyq Odaq, Ulybrıtanııa jáne Japonııa syndy retteýshilik senimi joǵary elder úshin tirkeý merzimi «Bir tereze» qaǵıdaty arqyly bar-joǵy 15 kúnge deıin qysqartylady.
Aıta keteıik, otandyq farmasevtıka ónerkásibi serpindi damyp keledi. 2029 jylǵa qaraı otandyq óndiris úlesin 50 paıyzǵa jetkizý kózdelgen. Qazirgi tańda 210 óndirýshi tirkelip, onyń 43-i dárilik preparat shyǵarady. О́tken jyly sala óndirisi 21,8%-ǵa ósip, ınvestısııa kólemi eki esege artty, al eksport kórsetkishi 32,9%-ǵa kóbeıgen.
«Otandyq kásiporyndarmen 90 uzaqmerzimdi kelisimshart jáne álemdik farmasevtıkalyq kompanııalar – Pfizer, Hoffmann-La Roche jáne AstraZeneca-men úsh kelisimshart jasaldy. Jalpy quny 400 mlrd teńgege jýyq toǵyz ınvestısııalyq joba qarastyrylyp jatyr», delingen habarlamada.
Farmasevtıka naryǵynyń jyldyq ósimi 10–13% deńgeıinde saqtalyp otyr.