Qazaqstanda 1 tamyzda bastalǵan Ulttyq aýyl sharýashylyǵy sanaǵy aıaqtaldy. Sanaq BUU Azyq-túlik jáne aýyl sharýashylyǵy uıymynyń (FAO) aýyl sharýashylyǵy sanaqtarynyń onynshy Dúnıejúzilik baǵdarlamasy sheńberinde uıymdastyrylyp, el boıynsha shamamen 1,6 mıllıon úı sharýashylyǵy men 300 myń aýyl sharýashylyǵy sýbektisin qamtydy, dep habarlaıdy Egemen.kz.
Saýalnama barysynda jer jáne tehnıka paıdalanýy, egis kólemi, tyńaıtqysh qoldaný, mal sharýashylyǵynyń jaǵdaıy, jumyspen qamtý syndy aýyl sharýashylyǵyna tán negizgi kórsetkishter zertteldi. Málimetter iri agrokásiporyndardan bastap shaǵyn fermerler men jeke qosalqy sharýashylyqtarǵa deıingi barlyq deńgeıde jınaldy.
«Ulttyq aýyl sharýashylyǵy sanaǵyna qatysqan, qoldaý kórsetken jáne kómektesken barlyq azamattarǵa shynaıy alǵysymyzdy bildiremiz. Aıta ketý kerek, bul tek derekterdi jınaý boıynsha negizgi kezeńniń aıaqtalýy. Alda bizdi osy derekterdi óńdeý, salystyrý jáne ártúrli deńgeıde biriktirý boıynsha aýqymdy jumys kútip tur. Jınalǵan málimetter agrarlyq salanyń jaı-kúıi týraly obektıvti kórinis qalyptastyrýǵa múmkindik beredi. Aýyl sharýashylyǵynyń damýyna úles qosqan jáne osy mańyzdy isti qoldaǵan ár adamǵa alǵys aıtamyn», dedi QR SJRA Ulttyq statıstıka bıýrosynyń basshysy Maqsat Turlybaev.
Aıta keteıik, derekterdi jınaý eki kezeńnen turdy. Birinshi kezeń 1–31 tamyz aralyǵynda onlaın formatta ótti. Azamattar sanaq.gov.kz saıty jáne eGovMobile qosymshasy arqyly ESQ nemese SMS-kod kómegimen tirkelip, saýalnama toltyrdy. Bul múmkindikti 600 myńnan astam adam paıdalandy.
Ekinshi kezeń 20 qyrkúıekten 20 qazan aralyǵynda oflaın formatta uıymdastyryldy. El boıynsha 3 200-den astam ıntervıýer arnaıy planshettermen saýalnama júrgizip, derekterdiń naqtylyǵyn qamtamasyz etti. Sanaqqa poshta jáne áleýmettik qyzmet mamandary, sondaı-aq jumyspen qamtý ortalyqtary arqyly tartylǵan azamattar da belsene qatysty.
«Bul jumysta ıntervıýerlerdiń eńbegi orasan zor. Olar kún saıyn azamattarmen tikeleı baılanysta bolyp, sanaqtyń maqsatyn túsindirip, mańyzdy derekterdi jınady. Sonymen qatar, negizgi jumystarynda halyqpen jumys isteıtin poshtashylar, áleýmettik qyzmetkerler, kommýnaldyq qyzmet baqylaýshylary da qosymsha tabys tabý múmkindigine ıe boldy. Budan bólek, biz halyqty jumyspen qamtý ortalyqtary arqyly kelgen jumyssyz azamattardy sanaqqa tarttyq», dedi Bıýro basshysy.
Naýqan barysynda aqparattyq-túsindirý jumystary keńinen júrgizildi. Azamattar áleýmettik jeliler men óńirlik BAQ arqyly habardar etilip, SANAQ myrza atty chat-bot naqty ýaqyt rejıminde suraqtarǵa jaýap berip otyrdy. Sonymen qatar, 2 600-den astam ózine-ózi qyzmet kórsetý aımaǵy ashylyp, 1446 baılanys ortalyǵy 22 myńnan astam ótinish qabyldady.
Jınalǵan málimetter aýyldyq jerlerdiń damý deńgeıin baǵalap, agroónerkásip keshenin qoldaýdyń jańa tetikterin ázirleýge múmkindik beredi. Aldyn ala óńdeý jáne taldaý aldaǵy aılarda aıaqtalady. Nátıjeler keler jyly Ulttyq statıstıka bıýrosynyń resmı saıtynda jarııalanbaq.